काठमाडौं– पछिल्लो समय भारतमा रक्षा उद्योगको तीव्र विकास भइरहेको छ । रक्षा उद्योगमा भारतका विभिन्न निजी उद्योगले पनि हात हालेका छन् ।

यसै क्रममा पीटीसी इण्डष्ट्रिजले उत्तर प्रदेश राज्यस्थित रक्षा उद्योग करिडोरमा ५० एकड क्षेत्रफलमा कारखाना खोलेको छ । यसले टाइटेनियम र ‘सुपरएलोइ’ को उत्पादन गर्दै आएको छ ।

यस कारखानाले भारतमात्र नभई विश्वका विभिन्न मुलुकको माग धान्ने अपेक्षा गरिएको छ । टाइटेनियम र ‘सुपरएलोइ’ निकल र कोबाल्टमा आधारित पदार्थ हुन् ।

यस्ता पदार्थ रक्षा उत्पादनका लागि निकै महत्वपूर्ण मानिन्छ । ‘सुपरएलोइ’ हवाइ इन्जिनजस्ता उच्च तापक्रम उत्पन्न हुने अवस्थामा प्रयोग हुन्छ ।

पीटीसी इण्डष्ट्रिजले १ हजार करोड भारुको लागतमा कारखाना स्थापना गरेको हो । यसले बेलायती रक्षा उद्योग बीएई सिस्टमका लागि टाइटेनियम आपूर्ति गर्दै आएको छ ।

यस कारखानाबाट उत्पादित पदार्थलाई बीएई सिस्टमले एम–७७७ अल्ट्रा लाइटवेट हवित्जरका लागि प्रयोग गर्दै आएको छ । यो एम–७७७ हवित्जर भारतले पनि प्रयोग गर्छ ।

बीएई सिस्टमबाहेक इजरायलको इजरायली एरोस्पेस इण्डष्ट्रिज (आईएआई), सफ्रान र दसोँ एभ्यासोँले पनि यस कारखानाको उत्पादन प्रयोग गर्नेबारे दीर्घकालीन सम्झौता गरिसकेका छन् । भारतीय अनलाइन समाचार पोर्टल द प्रिन्टका अनुसार पछिल्लो समय विभिन्न विदेशी संस्थाहरुले टाइटेनियम आपूर्तिका लागि कम्पनीसँग सम्पर्क बढाउँदै लगेका छन् ।