काठमाडौं– बागमती प्रदेशका खानेपानी तथा ऊर्जा सिँचाइमन्त्री श्यामबहादुर खड्काले राजीनामा दिएका छन् । उनले मंगलबार मुख्यमन्त्री बहादुरसिंह लामालाई राजीनामा पत्र बुझाएका छन् ।  

यसअघि साउन ९ गते नेपाली कांग्रेसबाट सरकारमा सहभागी चार मन्त्रीले पनि राजीनामा दिएका थिए । सोही दिन मुख्यमन्त्री लामाले राजीनामा दिएका चारै मन्त्रीलाई बर्खास्त गरेका थिए । 

१४ वटा मन्त्रालय रहेको बागमती प्रदेश सरकारमा मुख्यमन्त्री लामासहित कांग्रेसबाट आठ जना सहभागी थिए । अब उनीसँगै हरिप्रभा खड्की सामाजिक विकास र कुन्दनराज काफ्ले आर्थिक मामिला तथा योजना मन्त्रालयको जिम्मेवारीमा छन् । 

मुख्यमन्त्री लामालाई पार्टी संसदीय दलको नेताबाट हटाउन २१ जना प्रदेशसभा सदस्यहरूको हस्ताक्षरसहित संसदीय दलको कार्यालयमा अविश्वासको प्रस्ताव पेस गरिएको छ । उक्त संख्या कुल प्रदेशसभा सदस्यको बहुमत रहेकाले लामालाई नेताबाट हटाएर बानियाँलाई प्रदेशसभा संसदीय दलको नेता चयन गर्न माग गरिएको छ । 

११० सदस्यीय वागमती प्रदेशसभामा कांग्रेसका ३७ सदस्य रहेका छन् । अविश्वास प्रस्ताव दर्ताको समयमा २१ जना मध्ये १८ जना प्रदेशसभा सदस्यहरु सहभागी थिए । तीन जना प्रदेशसभा सदस्यहरूले हस्ताक्षर गरे दलको कार्यालयमा उपस्थित थिएनन् । 

२१ जना प्रदेशसभा सदस्यहरूले दलको नेताविरुद्ध अविश्वास प्रस्ताव दर्ता गरेपछि मुख्यमन्त्री लामाको पद धरापमा परेको छ । यद्यपि, हस्ताक्षर गर्ने २१ मध्ये दुई प्रदेशसभा सदस्य (मीना पराजुली र माया श्रेष्ठ)ले मुख्यमन्त्री लामालाई नै समर्थन गर्ने बताइसकेका छन् । 

दलको नेताविरुद्ध अविश्वासको प्रस्ताव दर्ता भएपछि मुख्यमन्त्री लामाले विधानअनुसार बहुमत सदस्यको समर्थन रहेको सिद्ध गर्नुपर्ने हुन्छ । प्रदेश संसदीय दलको विधानको धारा १८ अनुसार अविश्वासको प्रस्ताव दर्ता भएपछि १५ दिनभित्र दलको बैठक बोलाउनुपर्ने हुन्छ ।