काठमाडौं– राप्रपा नेपालका अध्यक्ष कमल थापाले नक्कली भुटानी शरणार्थी काण्डमा संलग्नलाई जोगाउन खोजिएझैँ भिजिट भिसा प्रकरणलाई सामसुम पार्न खोजिएको आरोप लगाएका छन् । 

पार्टीको भातृ संगठन राष्ट्रिय किसान संगठन नेपालद्वारा आइतबार असार १५ धान दिवसमा आयोजित कार्यक्रममा बोल्दै थापाले यस्ता भ्रष्टाचारका काण्डको छानबिन र दोषीलाई कानुनको कठघरामा उभ्याउन जनताले बाध्य बनाउने बताए । 

थापाले नेपाललाई कृषि प्रधान देश भनिए पनि धान रोप्ने दिनको आधा समय बितिसक्दा पनि किसानले पर्याप्त रासायनिक मल नपाएको बताए ।  

किसान, मजदुर ,युवाहरूको पक्षमा सरकारले आशालाग्दो काम गर्न नसकेको उनले बताए । भ्रष्टाचार र ब्रह्मलुटमा सरकार लिप्त भएको थापाले उल्लेख गरे ।

जनताको सशक्त दबाबमा गिरिबन्धु टी स्टेट जग्गा, वाइडबडी जहाज खरिद, यती-ओम्नी काण्ड, माओवादी नक्कली लडाकु घोटाला लगायत भ्रष्टाचारका फाइल खोलिने र दोषीले उन्मुक्ति नपाउनेसमेत उनले दाबी गरे ।

२०८४ को निर्वाचनमा जनताले कांग्रेस, एमाले र माओवादीलाई कुनै हालतमा मत नदिने मनस्थिति बनाइसकेको भन्दै थापाले जनता विकल्पको खोजीमा रहेको बताए । 

राप्रपा नेपालले आफ्नो एजेन्डाबारे जनतालाई राम्रोसँग बोध गराई विकल्पका रूपमा प्रस्तुत गर्न सक्नुपर्ने आवश्यकता रहेको बताए । 

कार्यक्रममा राप्रपा नेपालका उपाध्यक्षहरू डाक्टर विष्णु भण्डारी , तेजकुमार कुरुङ्वाङ, महामन्त्री इन्द्र चित्रकार , किसान संगठनका अध्यक्ष डम्बर प्रसाद शिवाकोटी, ज्ञानेश्वर उपाध्याय लगायतले बोलेका थिए ।