काठमाडौं- सरकारले सामाजिक सञ्जालको प्रयोगलाई मर्यादित बनाउदै साइबर सुरक्षा जोखिम न्यूनीकरण गर्न पूर्वाधार बनाउने निर्माण गर्ने घोषणा गरेको छ ।

बिहीबार संघीय संसद्को संयुक्त बैठकमा बजेट प्रस्तुत गर्दै अर्थमन्त्री बिष्णु पौडेलले साइबर जोखिम न्यूनीकरण गर्न त्रैमासिक रुपमा अड्भाइजरी जारी गर्ने बताए ।

उनले देशभर फोरजी सेवालाई देशभर सञ्चालन गर्ने र काठमाडौं सहित ठुला शहरमा फाइभजी सेवा सुरु गरिने जानकारी दिए ।

त्यस्तै काठमाडौंमा सूचना प्रविधि पार्क निर्माण गर्ने, मध्य पहाडी लोकमार्गसँग जोडिएको क्षेत्रमा नयाँ डाटा सेन्टर निर्माण गर्ने उनले बताए ।

सञ्चार तथा सूचना प्रविधि मन्त्रालयलाई सरकारले ७ अर्ब ७२ करोड बजेट विनियोजन गरेको मन्त्री पौडेलले जानकारी दिए ।

त्यस्तै मन्त्री पौडेलले शिक्षा मन्त्रालयका लागि २ खर्ब ११ अर्ब १७ करोड विनियोजन गरिएको जानकारी दिए। उनले विद्यालय शिक्षाको सुधारका लागि आवश्यक योजना ल्याइने बताए ।

शिक्षक र विद्यार्थी संख्याको अनुपातमा विद्यालय गाभ्ने उनले उल्लेख गरे । विश्वविद्यालयको सहकार्यमा शिक्षक बैंकको स्थापना गरिने, शिक्षक दरबन्दीको पुनरावलोकन गर्ने र कुनै पनि शिक्षकको अभाव हुन नदिने उनले बताए ।

त्यस्तै अर्थमन्त्री पौडेलले स्वास्थ बीमाका लागि आगामी आर्थिक वर्षका लागि १० अर्ब बजेट विनियोजन गरिएको जानकारी दिए ।

निरोगी नेपाल स्वास्थ्य नेपाली कार्यक्रमको घोषणा गर्दै उहाले हरेक प्रदेशमा जलन उपचार विभाग सञ्चालन गर्ने बताए । स्वास्थ्य मन्त्रालयका लागि सरकारले ९५ अर्ब ८१ करोड बिनियोजन गरिएको उहाले बताए ।

पौडेलले स्वदेशमै रोजगारी सिर्जना गर्ने कार्यक्रमसहित श्रम, रोजगार तथा सामाजिक सुरक्षा मन्त्रालयका लागि ४ अर्ब २८ करोड बजेट विनियोजन गरिएको बताएका छन् ।