काठमाडौं– संघीय सरकारबाट सञ्चालित आयोजनाबाट झण्डै १५ लाख हेक्टर कृषियोग्य भूमिका सिँचाइ सुविधा पुगेको छ ।

अर्थमन्त्री विष्णुप्रसाद पौडेलले बिहीबार संसदमा प्रस्तुत गरेको आर्थिक सर्वेक्षणले संघीय आयोजनाबाट ०८१ फागुन सम्म १५ लाख ७३ हजार ५५९ हेक्टर देखाएको हो ।

सिँचाइ गुरुयोजना सन् २०१९ अनुसार २०८१ फागुनसम्म कुल सिँचाइयोग्य जमीन २५ लाख ३६ हजार ३१९ हेक्टरमध्ये ६२.२८ हेक्टर क्षेत्रफलमा सिँचाइ सुविधा विस्तार भएको हो ।

यसका साथै, कुल कृषियोग्य जमिन ३५ लाख ५७ हजार ७६४ हेक्टरमध्ये ४४.४ प्रतिशत जमिनमा सिँचाइ सुविधा पुगेको सर्वेक्षणमा उल्लेख छ ।

विगतको दशकमा सरकारले सिँचाइ क्षेत्रको लागि बजेट विनियोजन औसतमा १३.६ प्रतिशतले बढाएको र त्यस अवधिमा यस क्षेत्रको औसत खर्च १३.७ प्रतिशतले बढेको छ ।