काठमाडौं– राजतन्त्र पुनर्स्थापनाको माग गर्दै राजावादीहरूले बिहीबार काठमाडौंमा प्रदर्शन गर्दै छन् ।

राजधानीकेन्द्रित आन्दोलनका क्रममा बिहीबार रत्नपार्कको शान्तिवाटिकामा हुने आन्दोलनमा ४५ वटा राजावादी–हिन्दुवादी दल र समूह आन्दोलनमा सहभागी हुने बताइएको छ ।

राजावादीले रत्नपार्कलाई केन्द्र बनाएर आन्दोलन निरन्तर अघि बढ्ने संयुक्त जनआन्दोलन समितिले जनाएको छ । आन्दोलनमा सहभागीलाई छातासहित उपस्थित हुन भनिएको छ । राजसंस्था र हिन्दुराष्ट्र पुनर्स्थापना तथा संघीयता खारेजी नभएसम्म आन्दोलन जारी रहने राजावादी नेताहरूले दाबी गरेका छन् ।

बिहीबार सिफलबाट कमल थापा र नवराज सुवेदी नेतृत्वमा एउटा जुलुस अघि बढेको छ । उनीहरू रत्नपार्ककेन्द्रित आन्दोलनमा सहभागी हुन हिँडेका हुन् । संयुक्त जनआन्दोलन समितिका संयोजक नवराज सुवेदी, राप्रपा अध्यक्ष राजेन्द्र लिङ्देन, राप्रपा नेपालका अध्यक्ष कमल थापालगायतले कार्यक्रमलाई सम्बोधन गर्दैछन् ।

देश जोगाउन अवस्था र व्यवस्था बदल्नुपर्ने बाध्यात्मक परिस्थिति रहेको बताउँदै राजावादीले आन्दोलनको स्वरूप भद्र अवज्ञा र सत्याग्रह हुने उनीहरूको भनाइ छ ।