काठमाडौं – नायिका रेखा थापाको डेब्यू नाटक ‘मीरा’को प्रिमियर शो सरेको छ । राजनीतिक कारण देखाएर यो नाटकको प्रदर्शन स्थगन गर्नु परेको कान्तिपुर फिल्म एकेडेमीले जनाएको छ ।

कान्तिपुर फिल्म एकेडेमीको थिएटर उद्घाटन र ‘मीरा’ नाटकको प्रिमियर बिहीबार एकसाथ हुने बताइएको थियो । तर काठमाडौंमा राष्ट्रिय प्रजातन्त्र पार्टीसहितका राजावादी र प्रमुख सत्तारुढ नेकपा एमाले कार्यक्रम रहेकाले नाटकको प्रदर्शन मिति सरेको हो ।

राप्रपासमेतका राजावादीको आन्दोलनले आमजनजीवन प्रभावित हुन सक्ने भन्दै ‘मीरा’को प्रिमियर जेठ १९ लाई सारिएको कान्तिपुर फिल्म एकेडेमीले जनाएको छ ।

ठूलो पर्दामा साढे दुई दशक अभिनय गरेपछि नायिका रेखा थापाले ‘मीरा’बाट नाटकमा डेब्यू गर्दैछन् ।

नाटक स्थगन हुनुमा रेखाको पार्टीको शक्ति प्रदर्शन पनि प्रमुख कारण रहेको एकेडेमीले जारी गरेको विज्ञप्तिबाट बुझ्न सकिन्छ ।

रेखा राष्ट्रिय प्रजातन्त्र पार्टीकी नेतृ हुन् । यही पार्टीबाट गत प्रतिनिधि सभा चुनावमा उनले मोरङ ३ बाट उम्मेद्वारी पनि दिएकी थिइन् ।

उनले बुधबार मात्रै भनेकी थिइन्, ‘कसैको जनजीवन र व्यवसाय प्रभावित हुन्छ भने त्यो आन्दोलन, आन्दोलन होइन ।’ बिहीबार भने उनको पहिलो नाटक आफ्नै पार्टीको आन्दोलनले रोकिएको सूचना सार्वजनिक भएको छ ।