काठमाडौं– श्रम, रोजगार तथा सामाजिक सुरक्षामन्त्री शरतसिंह भण्डारीले सही र सत्य सूचनाको अभावको कारण रोजगारीको अवसरबाट युवाहरू वञ्चित हुनु परेको बताएका छन् । 

मंगलबार मन्त्रालयमा आयोजित श्रम संसार पोर्टल सञ्चालन सम्बन्धमा सरोकारवालाहरूसँग छलफल कार्यक्रममा बोल्दै मन्त्री सही सूचनाको अभावमा युवाहरू रोजगारीको अवसरबाट वञ्चित हुनु परेको बताएका हुन । 

मन्त्री भण्डारीले आफू मन्त्री भएर मन्त्रालयमा आएपछि दुई युवाहरू भेटेर  रोजगारी माग्न आउँदा देशभित्र कसरी एकीकृत रोजगारी सूचना दिने सन्दर्भमा आएको अवधारणा अनुसार श्रमसन्सार पोर्टलको आविष्कार भएको बताए । 

उनले भने, यो केवल एक सामान्य पोर्टल मात्र होइन, मलाई विश्वास छ, यो एउटा सामाजिक क्रान्तिको रूपमा स्थापित हुनेछ, यसले युवाहरूलाई देश भित्र पनि मिहिनेत र आत्मविश्वास भर्नेछ । 

मन्त्री भण्डारीले देशभित्र सोसफोर्स नभए रोजगारी वा कुनै पनि अवसर पाउन नसकिने दुःखद भाष्य निर्माण भएको चिन्ता व्यक्त गर्दै क्षमता र योग्यताको आधारमा रोजगारीको अवसर सृजना गर्न यस पोर्टल मार्फत युवाहरूमा विश्वास जगाउने विश्वास व्यक्त गरे । 

वैदेशिक रोजगारका लागि उचित सूचना अभावका कारण बिचौलियाहरूले गाउँघरमा ठग्ने गरेको जिकिर गर्दै यसको सदुपयोग गरी सात सय ५३ वटा स्थानीय तहमा यसले सही सुचना सम्प्रेषण गर्ने उनले बताए । 

उनले भने, अब सबै स्थानीय तहमा एकीकृत रूपमा वैदेशिक तथा स्वदेशमा भएका रोजगारका अवसरहरूको सही सूचना सम्प्रेषण हुनेछ, यसले बिचौलियाहरूको धन्धा बन्द भई आफ्नै गाउँघरमा ठगिन रोकिनेछ । 

मन्त्री भण्डारीले सबैको सहयोग, साथ र सहकार्यले सूचना प्रविधिको सही सदुपयोग गरी एकीकृत एकद्धार सूचना प्रणाली स्थापित गर्नु नै मुख्य उद्देश्य रहेको बताए । 

श्रम, रोजगार तथा सामाजिक सुरक्षा मन्त्रालय र स्विस सरकारको सहयोगमा निर्माण भएको श्रमसन्सार रोजगारी पोर्टल यही मे १, विश्व मजदुर दिवस अवसरमा प्रधानमन्त्री केपी शर्मा ओलीको हातबाट लन्च गरिनेछ ।