काठमाडौं- राष्ट्रिय प्रजातन्त्र पार्टी (राप्रपा) ले पक्राउ परेका नेताहरूलाई २४ घण्टाभित्र रिहा गर्न सरकारलाई अल्टिमेटम दिएको छ ।

राप्रपा केन्द्रीय कार्यसम्पादन समितिको बैठकले आफ्ना दुई नेताहरू उपाध्यक्ष रवीन्द्र मिश्र र महामन्त्री डा.धवलशमशेर जबरालाई २४ घण्टाभित्र रिहा नगरे देशभर विरोधका कार्यक्रम गर्ने चेतावनी दिएको छ ।

शुक्रबार काठमाडौंको तीनकुनेमा भएको राजावादीहरुको हिंसात्मक प्रदर्शनमा रवीन्द्र र धवलशमशेर सहभागी थिए । उनीहरूलाई प्रहरीले शुक्रबार नै राति घरबाट समातेको थियो ।

राप्रपा अध्यक्ष राजेन्द्र लिङ्देनले केन्द्रीय कार्यसम्पादन समितिको बैठकले दुई नेतालगायतलाई २४ घण्टाभित्र रिहा गर्न सरकारलाई अल्टिमेटम दिएको बताएका छन् ।

तीनकुनेकमा सरकारकै कारण हिंसात्मक घटना भएको राप्रपाले ठहर गरेको छ । उक्त घटनामा एकजना पत्रकारसहित दुईजनाको मृत्यु भएको थियो ।

प्रदर्शनकारीहरूले एक निजी घर, सार्वजनिक सम्पत्ति, सरकारी कारर्यालय, व्यवसायिक स्थल र कयौँ गाडीमा तोडफोड, आगजनी र लुट मच्चाएका थिए । उक्त प्रकरणमा अहिलेसम्म १११ जना पक्राउ परिसकेका छन् ।