काठमाडौं– प्रतिपक्षी राष्ट्रिय स्वतन्त्र पार्टी (रास्वपा)ले चैत १५ गतेको घटना छानबिनका लागि उच्च न्यायिक छानबिन आयोग गठन गर्न सरकारसँग माग गरेको छ । 

रास्वपाको शनिबार बसेको सचिवालयको ‘भर्चुअल’ बैठकले तीनकुने क्षेत्रमा राजसंस्था समर्थकको आन्दोलनपछि सुरु भएको हिंसात्मक क्रियाकलापको छानबिनका लागि उच्च न्यायिक छानबिन आयोग गठन गर्न सरकारसँग माग गरेको हो ।  

‘काठमाडौंको तीनकुने, कोटेश्वर र जडीबुटी क्षेत्रमा २०८१ चैत्र १५ गते घटेको घटनामा संलग्न दोषीहरूलाई कानुनी दायराभित्र ल्याइ यथोचित कारबाही सुनिश्चित गर्न उच्च न्यायिक छानबिन आयोग गठन गर्न सरकारसँग माग गर्ने,’ बैठकपछि कार्यवाहक प्रवक्ता मनिष झाद्वारा जारी विज्ञप्तिमा उल्लेख छ ।  

सचिवालयको ‘भर्चुअल’ बैठकले चैत १८ गते केन्द्रीय समिति बैठक बोलाउने पनि निर्णय गरेको छ । केन्द्रीय समिति बैठक पार्टीको केन्द्रीय कार्यालय बनस्थलीमा बस्ने बताइएको छ ।