काठमाडौं – शुक्रबार तीनकुने, कोटेश्वर र नरेफाँट क्षेत्रमा भएको तोडफोड र विध्वंसलाई लिएर काठमाडौं महानगरपालिकाले पूर्वराजा ज्ञानेन्द्र शाहसहितलाई जरिवाना तिराउने तयारी गरेको छ । 

महानगरको टोलीले राजावादीहरूबाट विध्वंस मच्चाएको क्षेत्रमा स्थलगत अनुगमन गरेर मेयर बालेन्द्र साहलाई प्रतिवेदन बुझाइसकेको छ । 

‘क्षतिको अवस्था हेर्दा जरिवाना रकम कम्तीमा पनि १० लाख हुन सक्छु, स्रोतले भन्यो, जरिवाना लागि पुर्जी कसको नाममा काट्ने भनेर छलफल भइरहेको छ ।’

महानगर स्रोतले बताएअनुसार जरिवाना पुर्जी काट्न राजावादी आन्दोलन समिति संयोजक नवराज सुवेदी, राजावादीले बिहीबार जनकमान्डर घोषणा गरेका दुर्गा प्रसाईं र निर्मल निवासस्थित पूर्वराजा ज्ञानेन्द्र शाहको नामबारे पनि छलफल जारी छ ।

‘छलफलपछि जरिवाना पूर्जी आजै काटिन्छ । सम्भवतः निर्मल निवासका नाममा जरिवाना पुर्जी काटिन्छ । जरिवाना रकम १० लाख आसपास हुन सक्छु, स्रोतले खबरहबलाई भन्यो ।

महानगरका एक अधिकारीले बताएअनुसार राजावादीले तीनकुने, कोटेश्वर क्षेत्रका कयौँ संरचना ध्वस्त बनाएका छन् । तीनकुनेस्थित एक घरमा राजावादीले लगाएको आगो निभाउन गएको दमकल तोडफोड गरिएको छ । दमकल चालक र अन्य कर्मचारी पनि घाइते भएका छन् ।

यदि महानगरले पूर्वराजासहितका राजावादीको नाममा १० लाख आसपासको जरिवाना पुर्जी काटेमा यो अहिलेसम्मकै उच्च हुनेछ।