काठमाडौं – मध्यपश्चिम विश्व विद्यालयले जय नेपाल कप क्रिकेट प्रतियोगिताको उपाधि जितेको छ। मंगलबार भएको फाइनल खेलमा मध्यपश्चिमले लखनउ विश्वविद्यालयलाई ५८ रनले हराएको हो।

मध्य पश्चिमले दिएको १७६ रनको लक्ष्य पछ्याएको लखनउ निर्धारित २० ओभरको खेलमा ९ विकेटको क्षतिमा ११७ रनमा सीमित भयो।

लखनउका मनन कन्डपालले ५७ बलमा ५८ रन बनाउनुबाहेक अन्य ब्याट्सम्यानले राम्रो प्रदर्शन गर्न सकेनन्।

मध्यपश्चिमका दिवन पुनले ४ ओभरमा २२ रन खर्चेर तीन विकेट लिए। विपिन खत्रीले कुनै विकेट नलिए पनि ४ ओभरमा १० रन मात्र दिएर कसिलो बलिङ गरे।

यसअघि सुरुमा ब्याटिङ गरेको मध्यपश्चिमले ६ विकेटको क्षतिमा १७५ रन बनाएको थियो।

प्रतियोगितामा विपिन कार्की उत्कृष्ट खेलाडी घोषित भए। उत्कृष्ट बलरको उपाधिसमेत कार्कीले पाए। लोकेश बम उत्कृष्ट ब्याट्सम्यान चुनिए।