काठमाडौं- परम्परागत ठूला राजनीतिक दललाई चुनौती दिने गरी राष्ट्रिय स्वतन्त्र पार्टीका सभापति रवि लामिछाने र काठमाडौँ महानगरपालिकाका मेयर बालेन्द्र शाह एकै ठाउँ उभिएपछि धरान उपमहानगरपालिकाका मेयर हर्क साम्पाङ आक्रोशित देखिएका छन्।

आइतबार सबेरै रवि र बालेनबीच सात बुँदे सहमति भई बालेन्द्र शाह रास्वपामा प्रवेश गर्ने सहमति सार्वजनिक भएसँगै साम्पाङले सामाजिक सञ्जाल फेसबुकमा लगातार प्रतिक्रिया जनाइरहेका छन्। आइतबार बिहानदेखि हालसम्म उनले दर्जन भन्दा बढी स्टाटस लेखिसकेका छन्।

नौ महिना लामो कारागार बसाइबाट छुटेलगत्तै रवि लामिछाने र बालेन्द्र शाहबीच सुरु भएको संवाद आइतबार सबेरै सहमतिमा टुंगिएको थियो।

उक्त सहमतिलाई वैकल्पिक राजनीतिमा ठूलो घटनाका रूपमा हेरिएको छ। यही घटनापछि श्रम संस्कृति पार्टीका अभियन्ता साम्पाङले तीव्र असन्तुष्टि व्यक्त गरेका हुन्।

आइतबार बिहान सबेरै उनले फेसबुकमा लेखेको पहिलो स्टाटसमा ‘सिंहदरबार जलाउँछु भन्ने र जलाएरै देखाउनेदेखि सावधान ! देश सिध्याउँछन् यी विदेशी दलालहरुले !’ भन्दै कडा टिप्पणी गरेका थिए।

त्यसपछि दिनभर उनले नेतृत्व, सत्ता, मिडिया र वैकल्पिक राजनीतिलाई लक्षित गर्दै एकपछि अर्को स्टाटस लेखिरहे। उनले आफूले अघि सारेको ‘श्रम संस्कृति’ नै वास्तविक परिवर्तनको आधार भएको दाबी पनि दोहोर्‍याए।

सबैभन्दा पछिल्लो स्टाटसमा साम्पाङले ‘श्रम संस्कृतिले ल्याउने छ बहुमत ! अरु त मिडिया ट्रायल मात्रै हो ! जनतामा जानु कता हो कता प्रधानमन्त्री रे !’ भन्दै कटाक्ष गरेका छन्।

साम्पाङका यी अभिव्यक्तिलाई कतिपयले वैकल्पिक राजनीतिभित्रको आन्तरिक असन्तुष्टि र नेतृत्व प्रतिस्पर्धाको संकेतका रूपमा हेरेका छन्।

रवि–बालेनको सहकार्यले उत्पन्न नयाँ राजनीतिक समीकरणले आगामी दिनमा वैकल्पिक शक्तिहरूबीच थप तरंग ल्याउने अनुमान गरिएको छ।