काठमाडौं– किस्ट मेडिकल कलेज तथा शिक्षण अस्पताल ललितपुरमा चिकित्सक र स्वास्थ्यकर्मीमाथि गरिएको कुटपिट र तोडफोडको घटनाप्रति नेपाल चिकित्सक संघले आपत्ति जनाएको छ । साथै संघले तोडफोडमा संलग्नलाई तत्काल कानुनी कारबाही गर्न माग गरेको छ ।

कार्तिक ८ गते उपचारका क्रममा एक गर्भवतिको मृत्यु भएपछि आक्रोशित समूहले अस्पतालमा तोडफोड गर्दै चिकित्सक तथा स्वास्थ्यकर्मीमाथि आक्रमण गरेका थिए । 

उक्त घटनापछि सङ्घले मंगलबार जारी गरेको प्रेस विज्ञप्तिमा अस्पतालजस्तो संवेदनशील क्षेत्रमा भएको यस्तो हिंसात्मक कार्यको घोर भत्सर्ना गर्दै दोषीहरूलाई कानूनी कारबाहीको दायरामा ल्याउन माग गरेको छ। सङ्घले उपचारको क्रममा मृत्यु भएकी दिवङ्गत आत्माप्रति श्रद्धाञ्जली अर्पण प्रकट गरेको छ।

‘यदि उपचारको क्रममा लापरबाही भएको आशंका छ भने त्यसको समाधानका लागि कानूनी बाटो खुला छ। तर चिकित्सक तथा स्वास्थ्यकर्मीमाथि कुटपिट र स्वास्थ्य संस्था तोडफोड गर्नु जस्तो अमानवीय कार्यले स्वास्थ्य सेवा प्रणालीमै असर पुर्‍याउँछ’ , विज्ञप्तिमा भनिएको छ । 

संघले यस्तो घटनाले सम्पूर्ण स्वास्थ्य क्षेत्रको मनोबल गिराउने र सेवा प्रवाहमा असर पार्ने बताउँदै, संलग्न दोषीलाई स्वास्थ्यकर्मी तथा स्वास्थ्य संस्थाको सुरक्षा ऐन २०६६ (संशोधन २०७९) अनुसार कडाभन्दा कडा कारबाही गर्न सरकारसँग जोडदार माग गरेको छ ।

साथै, सुरक्षित र भयरहित वातावरणमा स्वास्थ्य सेवा प्रवाह गर्न राज्यले आवश्यक व्यवस्था मिलाउनुपर्ने पनि संघको भनाइ छ ।