काठमाडौं – नायक विजय बराल शीर्ष भूमिकामा रहेको दोस्रो फिल्म ‘जनै हराएको मान्छे’ हलबाट उत्रिसकेको छ । यो फिल्म भदौ ६ बाट प्रदर्शनमा आएको थियो ।

विजय कीर्तिमानी नायक हुन् । उनले पहिलो पटक शीर्ष भूमिकामा अभिनय गरेको फिल्म ‘पूर्णबहादुरको सारङ्गी’ हो । जसले नेपाली फिल्म इतिहासमै सबैभन्दा बढी ४६ करोड ८७ लाखभन्दा बढीको व्यापार गरेको थियो ।

यही फिल्मको व्यापारिक सफलता पश्चात विजयले ‘जनै हराएको मान्छे’ साइन गरेका हुन् । यो फिल्म बक्स अफिसमा फ्लप भएको छ ।

पहिलो फिल्मको तुलनामा यस फिल्मको व्यापार साढे ४५ करोडभन्दा बढीले कम छ ।

चलचित्र विकास बोर्डका अनुसार यस फिल्मको लाइफटाइम ग्रस कलेक्सन एक करोड २३ लाख ८२ हजार मात्रै छ ।

अब विजय शीर्ष भूमिकामा रहेको अर्को फिल्म ‘वरिष्ठ बलराम’ भाइटीका अर्थात् कात्तिक ६ बाट प्रदर्शनमा आउँदैछ ।