काठमाडौं– काठमाडौं महानगरपालिकाले आफ्नो स्वामित्वमा रहेको सीटी मार्केटका सबै पसलहरू तीन महिनाभित्र खाली गर्न निर्देशन दिएको छ ।

महानगरको राजस्व विभागले जारी गरेको सार्वजनिक सूचनाअनुसार, सीटी मार्केटलाई आय ठेक्कामा लिने सम्झौता २०७९ पुस २२ गते गणेश इलेक्ट्रोनिक्ससँग भए पनि सम्झौताअनुसार कार्य अघि नबढेपछि बजार भत्काई वडा कार्यालय भवन निर्माण गर्ने निर्णय गरिएको हो ।

भदौ १५ गतेको नगर कार्यपालिकाको बैठकले गणेश इलेक्ट्रोनिक्सले कबोल गरेको वार्षिक २ करोड ७१ लाख रुपैयाँ बराबरको रकम पसलधनीले बाँकी भुक्तानी गरेपछि मात्र धरौटी रकम फिर्ता गर्ने निर्णय गरेको थियो ।

हाल सीटी मार्केटका २७ जना व्यवसायीलाई ३ महिनाभित्र अन्यत्र सरेर पसल खाली गर्न निर्देशन दिइएको छ ।