काठमाडौँ– आफ्नै घरमा राखिएकी सहयोग महिलालाई बलात्कार गरेको आरोपमा जेल सजाय भोगिरहेका मधेश प्रदेशका पूर्व प्रमुख राजेश अहिराजले थुनामै रहनुपर्ने भएको छ । उनलाई थुनामा पठाउने जिल्ला अदालत काठमाडौँको आदेशलाई उच्च अदालत पाटनले बिहीबार सदर गरेको छ ।

उच्च अदालत पाटनका मुख्य न्यायाधीश लालबहादुर कुँवर र खडानन्द तिवारीको संयुक्त इजलासले काठमाडौँ जिल्ला अदालतको आदेशलाई निरन्तरता दिएपछि अहिराजको जेल बसाइ लम्बिने भएको हो ।

गत साउन १४ गते जिल्ला अदालत काठमाडौँका न्यायाधीश पिताम्बर शर्माको एकल इजलासले उनलाई पुर्पक्षका लागि थुनामा पठाउने आदेश दिएको थियो ।

राजेश अहिराज अहिले डिल्लीबजार कारागारमा छन् । घरमै काममा सघाउन राखिएकी युवतीलाई बलात्कारको आरोपमा उनी पक्राउ परेका थिए । लामो समय भारतमा लुकेर बसेका उनी गत साउनमा काठमाडौँ आएपछि समातिएका थिए ।

पठनपाठनको जिम्मा लिएका अहिराजले घरमै राखिएकी युवतीलाई बलात्कार गरेपछि उजुरी परेको थियो।

काठमाडौँको थापागाउँस्थित घरमा अहिराजले २०८१ जेठ ४ मा बलात्कार गरेको आरोप लगाउँदै मुद्दा दायर भएको थियो । एक्लै कोठामा बसेका बेला अहिराजले आएर बलात्कार गरेको मुद्दामा उल्लेख थियो ।