धनगढी– कैलालीको खुटिया नदीमा पौडी खेल्न गएका चारजना साथीको एकै पटक डुबेर ज्यान गएको छ ।

गोदावरी नगरपालिका–९ स्थित खुटिया नदीमा नुहाउने क्रममा बिहीबार दिउँसो २ बजेतिर धनगढीका चार किशोरहरू बेपत्ता भएका थिए।

बेपत्ता भएका चारैजना किशोरको शव नदीबाट नेपाल प्रहरी र सशस्त्र प्रहरीसहितको टोलीले निकालेको जिल्ला प्रहरी कार्यालयका प्रहरी नायब उपरीक्षक (डीएसपी) राजकुमार सिंहले बताए।

पौडी खेल्ने क्रममा डुबेर ज्यान गुमाउनेहरूमा १७ वर्षीय सक्षम जोशी, १५ वर्षीय जेव भण्डारी, १७ वर्षीय जादेज भण्डारी र १७ वर्षकै प्रतीक चौधरी छन्।

यी किशोरहरू बिहीबार दिउँसो सात जनाको समूह बनाएर खुटिया नदीमा नुहाउन गएका थिए । नुहाउने क्रममा पौडी खेल्न पसेका अन्य तीनजनाको उद्दार गरिएको छ। चारैजना किशोरको शव परीक्षणका लागि धनगढी ल्याइएको छ ।