एजेन्सी – सांसद्हरूले आफ्नो तलबभत्ता बढाउन खोजेको भन्दै इन्डोनेशियाको संसद् भवन अगाडि ठूलो प्रदर्शन भएको छ ।
राजधानी जकार्तास्थित संसद् भवनअघि भेला भएका सयौँ प्रदर्शनकारीहरूले तलब र भत्ता बुझिरहेका सांसदहरूको विरोध गरिरहेका छन् ।
प्रदर्शनकारीहरूले सांसदले आफ्नो भत्ता बढाउने प्रयास गरिरहेको, तर मजदुरको तलब बढाउन राखिएको माग नजरअन्दाज गरेकोप्रति असन्तोष व्यक्त गरेका छन् ।
सांसदको तलबभत्ता मामिलामा एक सातामै दोस्रो ठूलो प्रदर्शन भएको हो । यो प्रदर्शनले राष्ट्रपति प्रबोवो सुबियान्तो नेतृत्वको सरकारप्रति असन्तोष चुलिएको देखाएको छ । सुबियान्तोले कार्यकाल सुरु गरेको एक वर्ष पनि पूरा भएको छैन ।
प्रदर्शनकारीहरूले सांसदले पाइरहेको तलबभत्ता र सुविधा आवश्यकताभन्दा बढी भएको, तर देशमा तलबवृद्धि नगरिएको बताएका छन् ।
यो प्रदर्शनको सुरुवात मजदुर सङ्गठनले सुरु गरेको थियो र उनीहरूले न्यूनतम तलब बढाउन तथा कर कम गर्न माग राखेका छन् ।
मजदुरले थालेको प्रदर्शनमा विद्यार्थीहरू पनि सहभागी हुँदैछन् । उनीहरूले राजनेताहरूको आलीशान जीवनशैलीप्रति आक्रोश व्यक्त गरिरहेका छन् ।
प्रदर्शन आफ्नो नियन्त्रणमा राख्न इन्डोनेशियाको सरकारले जकार्तामा मात्रै चार हजारभन्दा बढी प्रहरी तैनाथ गरेको छ ।
गत सोमबार प्रहरीले अश्रुग्यास र पानीको फोहोरा प्रहार गरी भीड तितरबितर पारेको थियो । एकैदिन ३०० भन्दा बढी प्रदर्शनकारीलाई गिरफ्तार गरेको थियो ।
प्रतिक्रिया