काठमाडौं– काठमाडौं महानगरपालिकाको ज्यादती गरेको भन्दै कवाड व्यवसायीले आज बिहीबार तेस्रो दिन पनि आन्दोलन जारी राखेका छन् । झरीमा रुझ्दै महानगरको कार्यालय पुगेका उनीहरूले महानगर प्रमुख बालेन शाहविरुद्ध नाराबाजी गरेका हुन् ।
भृकुटीमण्डपबाट शुरु भएको कवाड व्यवसायीको र्याली कमलादीस्थित काठमाडौं महानगरपालिका पुगेको थियो ।
प्रदर्शनमा सहभागी धेरैले राष्ट्रिय झण्डा बोकेका छन् ।
सर्वोच्च अदालतको आदेश विपरीत काठमाडौं महानगरपालिका प्रमुख बालेन्द्र शाहले कवाड व्यवसायीमाथि ज्यादती गरिरहेको भन्दै उनीहरू आन्दोलनमा उत्रिएका हुन् । उच्च अदालतको आदेश पालना गर्नुपर्ने र कवाड व्यवसायीलाई शान्तिपूर्ण वातावरणमा व्यवसाय गर्न दिनुपर्ने उनीहरूको माग छ ।
आन्दोलनमा सहभागीहरूले सर्वोच्च अदालतको आदेश पालना गर, कबाड व्यवसायीमाथिको अत्याचार बन्द गर, बालेनको गुण्डागर्दी एवं तोडफोड बन्द गर, बालेन तेरो पाराले दुख पायो साराले लगायतका नारा लगाएका छन् ।
उनीहरूले आफूहरूको माग पूरा नभएसम्म आन्दोलन जारी रहने जनाएका छन् ।
काठमाडौँ महानगरपालिकाले शहरी क्षेत्रमा कवाड भण्डारण र प्रशोधन उद्योग स्थानान्तरण गर्न खोजे पनि कवाड व्यवसायीहरूले अटेरी गर्दै आएका छन् ।
उच्च अदालत पाटनले भदौ ६ गते काठमाडौँ महानगरपालिकालाई तत्काल कवाडी व्यवसाय नहटाउन अन्तरिम आदेश दिएपछि कवाड व्यवसायीहरूले महानगर कार्यालय घेराउ गर्दै आएका छन् ।
तस्बिरहरू : नेपाल फोटो लाइब्रेरी
प्रतिक्रिया