काठमाडौँ – भारतीय सञ्चार माध्यमले नेपाली सीमाबाट भारतको बिहार राज्यमा तीन जना आतङ्ककारी प्रवेश गरेको दाबी गरेका छन् । भारतीय सञ्चार माध्यमका अनुसार नेपालको सीमाबाट पाकिस्तानमा आधारित आतङ्ककारी संगठन जैश ए मोहम्मदका तीन जना सदस्य बिहार प्रवेश गरेका हुन् ।

बिहार राज्यको प्रहरीलाई उद्धृत गर्दै भारतीय माध्यमले दाबी गरेअनुसार नेपालको सीमाबाट रावलपिण्डीका हसनैन अली, उमरकोटका आदिल हुसैन र बहावलपुरका मोहम्मद उस्मान बिहार प्रवेश गरेका हुन् । जागरणले उनीहरू अगस्तको दोस्रो हप्तामा काठमाडौं पुगेका थिए र गत हप्ता बिहारमा प्रवेश गरेको दाबी गरेको छ ।

नेपालको सीमा हुँदै तीन आतङ्कवादीहरू बिहारको सीमामा प्रवेश गरेको भनिएको विषयमा राज्य प्रहरी मुख्यालयले सीमावर्ती जिल्लामा उच्च सतर्कता जारी गरेको छ । नेपालसँग सीमा जोडिएका क्षेत्रमा सीसीटीभी क्यामेराको अनुगमन गरिएको छ ।

नेपालसँग सीमा जोडिएको पूर्णिया जिल्लाका डीआईजी प्रमोद कुमार मण्डलले बताएअनुसार राज्य प्रहरी मुख्यालयको निर्देशनअनुसार सीमावर्ती क्षेत्रमा विशेष सतर्कता अपनाइएको छ । बिहार प्रहरीले तीनै जनाको तस्बिरहरू पनि सार्वजनिक गरेको छ ।

बिहार राज्यमा आगामी अक्टोबर–नोभेम्बर महिनामा विधानसभा चुनाव आयोजना हुँदैछ । नेपाली सीमाबाट आतङ्ककारी प्रवेश गरेको भन्दै भारतीय सञ्चार माध्यममा आएका समाचारलाई विधानसभा चुनावसँग जोडेर पनि हेरिएको छ ।