काठमाडौं – बलिउडका स्टार कार्तिक आर्यन पछिल्ला दिनमा आफ्नो चलचित्र करिअरलाई फरक-फरक शैलीले भरिपूर्ण बनाउन तिव्र गतिमा अघि बढिरहेका छन्। निर्देशक समीर विद्वांसको ‘तू मेरी मे तेरा’ र अनुराग बासुको रोमान्टिक फिल्म पूरा गरेपछि, कार्तिक अब मृगदीप सिंह लाम्बा निर्देशित प्राणी-कमेडी फिल्म ‘नागजिल्ला’मा देखिन लागेका छन्। अनौठो हास्य, ड्रामा र अभिनव कथाले भरिएको यस प्रोजेक्टले दर्शकलाई नयाँ प्रकारको मनोरञ्जन दिने विश्वास गरिएको छ।

यसैबीच, पिंकभिलाको रिपोर्टअनुसार, कार्तिकले ‘शेरशाह’ फिल्मका निर्देशक विष्णुवर्धनसँग जम्बी-थ्रिलर फिल्मका लागि छलफल गरिरहेका छन्। भारतीय मिडिया अनुसार, “कार्तिक आर्यन केही समयदेखि जम्बी फिल्ममा काम गर्न उत्साहित थिए । विष्णुवर्धनले तयार पारेको अद्वितीय कथा सुनेपछि उनी तुरुन्तै आकर्षित भए। उनले प्रोजेक्टलाई स्वीकृति दिइसकेका छन् भने २०२६ जुलाईदेखि छायांकन सुरु गर्ने योजना बनाइएको छ।”

अभिनेता कार्तिकले २०२५ नोभेम्बरसम्म अनुराग बासुको प्रोजेक्ट पूरा गर्नेछन्। त्यसपछि उनी फिल्म ‘नागजिल्ला’ र फिल्म ‘क्याप्टेन इन्डिया’मा लाग्नेछन्। साथै, उनी थप दुईवटा फिल्मबारे पनि छलफलमा छन्, तर विवरण भने सार्वजनिक गरिएको छैन।

कार्तिकको व्यस्त समयतालिका हेर्दा, आगामी वर्षमा दर्शकलाई नयाँ-नयाँ शैलीका फिल्ममार्फत रोमाञ्चक अनुभव दिने निश्चित देखिन्छ।