काठमाडौं – प्रधानमन्त्री तथा नेकपा एमालेका अध्यक्ष केपी शर्मा ओली पूर्वराष्ट्रपति विद्यादेवी भण्डारीको कुरै नसुनी मदन भण्डारी फाउण्डेशनको कार्यक्रमबाट बिदा लिएर हिँडेका छन् । उनले अर्को कार्यक्रमका लागि ५ बजे फ्लाइट रहेको भन्दै कार्यक्रमबाट बिदा लिएका हुन् ।

पूर्वराष्ट्रपति भण्डारीले ‘मेरा कुरा पनि सुनिदिनुहोस्’ भन्ने आग्रह गरे पनि हतार भएर हिँड्न लागेको प्रधानमन्त्री ओलीले जानकारी गराए । उनले ठट्यौली गर्दै भने, ‘मलाई सम्माननीय पूर्वराष्ट्रपतिज्यूले मेरा पनि कुरा सुन्नुहोस् न भन्दै हुनुहुन्थ्यो, तपाईं राम्रै बोल्नुहुन्छ भन्ने मलाई थाहा छँदैछ ।’ ओलीले यसो भनिरहँदा सभाहलमा हाँसोको फोहोरा छुटेको थियो । उनले थपे, ‘आज मात्र सुन्नुपर्ने होइन, उहिलेदेखि सुन्दै आएको हो, त्यसकारण सुन्दै आएको छु, राम्रो बोल्नुहुन्छ थाहा छ ।’

प्रधानमन्त्री ओलीले ईश्वर पोख्रेलले पनि के बोल्छन् थाहा भएको बताए । ‘मैले सुन्न बसिरहनुपर्दैन मलाई धेरै हतार भएको हुनाले म सयम धेरै नलिऊँ ।’

मदन भण्डारीको ७४औं स्मृतिमा आयोजित कार्यक्रममा पूर्वराष्ट्रपति भण्डारीले नेकपा एमालेको राजनीतिमा पुनरागमनको घोषणा गर्ने विषय पेचिलो बनेको छ । एमालेभित्र पूर्वराष्ट्रपति भण्डारीले नेतृत्व लिने र उनलाई विधान महाधिवेशबाटै रोक्नेलगायतका विषय बहसमा छन् । प्रधानमन्त्री ओली भने पूर्वराष्ट्रपतिका कुरा नसुनी कार्यक्रमबाट बाहिरिएका छन् ।