काठमाडौं– राष्ट्रिय स्वतन्त्र पार्टी (रास्वपा) ले प्रतिनिधिसभा बैठकमा आज (शनिबार) पनि अवरोध गर्ने निर्णय गरेको छ ।

शनिबार बसेको संसदीय दलको बैठकले प्रतिनिधिसभाको बैठकमा अवरोध कायम राख्ने निर्णय गरेको हो ।

‘सदन अवरुद्ध नै हुन्छ । हाम्रो आन्दोलन जारी नै छ । झारा टार्ने समिति मानेका छैनौँ,’ बैठकपछि सांसद हरि ढकालले भने, ‘भिजिट भिसा प्रकरणमा उच्चस्तरीय छानबिन समिति गठन नभएसम्म आन्दोलन जारी रहन्छ ।’

शनिबारको संसद बैठकलाई प्रधानमन्त्री केपी शर्मा ओलीले सम्बोधन गर्ने कार्यक्रम छ । तर, रास्वपाले प्रधानमन्त्रीको सम्बोधनका क्रममा पनि आफ्नो आन्दोलन जारी रहने बताएको छ ।

प्रधानमन्त्रीले बोलेको त सुन्नु होला नि ? भन्ने पत्रकारको जिज्ञासामा सांसद ढकालले भने, ‘प्रधानमन्त्री बोल्नुहुन्छ । हाम्रो आन्दोलन पनि सँगै हुन्छ ।’