क्यानडा – क्यानडाको भान कोभरमा रहेका फिलिपिनोहरुले पर्व मनाइरहेको समयमा भीडमा कार प्रवेश गराइएपछि मर्नेको सङ्ख्या ११ पुगेको छ।

यसरी मारिनेमध्ये पाँच वर्षदेखि ६५ वर्ष बीचको भएको प्रहरीले जनाएको छ। घटनामा शङ्कास्पद ३० वर्षीय युवाको मानसिक अवस्था ठिक नभएको जनाइएको छ। अधिकारीले फिलिपिनोलाई लक्षित गर्दै सो घटना नभएको बताएको छ। साथै यो आतङ्कवादी समूहबाट नभई मानसिक सन्तुलन बिग्रेका कारण भएको जनाइएको छ।

अहिले गिरफ्तार भएका ती युवा विगतमा पनि मानसिक सन्तुलनका कारण समस्यामा परेको जनाइएको छ।

त्यहाँका मेयर केन सेमले शनिबारको दिन अघिको सो घटनालाई कालो दिनको रूपमा व्याख्या गरेका छन्। उनले फिलिपिनो समुदायलाई सम्बोधन गर्दै क्यानडाले सधैँ आफ्नै ठानेको बताएका छन्। आर्थिक स्तर कमजोर रहेको फिलिपिन्सका लाखौँ मानिस काममा लागि क्यानडा पुग्ने गरेका छन्।