काठमाडौं– नेपाल प्रहरीले तत्कालीन राजा ज्ञानेन्द्र शाहको राजकाज जोगाउन खरिद भएको अश्रुग्यास राजावादीमाथि नै प्रहार गरेको भेट्टिएको छ ।

राजसंस्था पुनस्थापनाका लागि शुक्रबार काठमाडौंमा भएको प्रदर्शन अराजक बनेपछि नियन्त्रणमा लिनका लागि प्रहरीले प्रयोग गरेको अश्रुग्यास ज्ञानेन्द्र शाहले आफ्नो प्रत्यक्ष शासनकालमा खरिद गरेको पाइएको छ ।

प्रहरीले तीनकुनेमा हिंसात्मक बनेको राजावादीको प्रदर्शन नियन्त्रणमा लिन सन् २००८ मै म्याद समाप्त (डेट एक्सपायर) भएको अश्रुग्यास प्रहार गरेको हो ।

खबरहबलाई प्राप्त अश्रुग्यासको प्रयोग भइसकेको बट्टामा अश्रुग्यासको म्याद सन् २००८ फुब्रुअरीमा समाप्त भएको उल्लेख छ । अर्थात् प्रहरीले प्रयोग गरेको उक्त अश्रुग्यासको म्याद २०६४ फागुन १९ अगावै समाप्त भएको हो ।

नेपाल प्रहरीले बेलाबेला आफूलाई अश्रुग्यासको अभाव रहेको बताउँदै आएको छ । हुलदंगा नियन्त्रणका लागि अति आवश्यक मानिने अश्रुगयास खरिदमा सरकारले ध्यान नदिने गरेको तीनकुनेको अश्रुग्यासको प्रयोगले देखाएको छ ।