काठमाडौं– नेपाली कांग्रेसका सांसद सुनिल शर्माले राजसंस्था पुनर्स्थापनाको माग गर्दै आयोजित आन्दोलनमा घाइते भएका राजावादीको निःशुल्क उपचार गर्ने भएका छन् ।

सांसद शर्माले सञ्चालन गर्दै आएको सिनामंगलस्थित काठमाडौं मेडिकल कलेज पब्लिक लिमिटेडले शुक्रबार तीनकुनेमा आयोजित प्रदर्शनका क्रममा घाइते भएका राजावादीको निःशुल्क उपचार गर्ने भएको हो ।

अस्पतालले विज्ञप्ति जारी गरेर आफ्नो सामाजिक उत्तरदायित्वअन्तर्गत घाइतेको निःशुल्क उपचार गर्ने जनाएको छ । 

कांग्रेस सांसद शर्मा र राजावादीका ‘कमान्डर’ दुर्गा प्रसाईं नजिकका साथी मानिन्छन् । प्रसाईंको नेतृत्वमा निस्किएका राजावादीले तीनकुनेमा गरेको प्रदर्शन अराजक बनेको थियो । 

उनीहरूले तीनकुनेस्थित अन्नपूर्ण पोस्ट दैनिक र एक निजी भवन र नजिकै पर्ने आलोगनगरस्थित नेकपा एकीकृत समाजवादीको मुख्यालयमा आगजनी गरेका थिए ।