काठमाडौं– राजसंस्था पुन:स्थापनाका लागि गठित नवराज सुवेदी नेतृत्वको संयुक्त जनआन्दोलन समितिको प्रदर्शन हिंसात्मक बनेको छ ।

राजावादीहरू स्थानीय प्रशासनले निर्धारण गरेको तीनकुने क्षेत्रबाट नयाँ बानेश्वरतर्फ अघि बढ्न खोजेपछि प्रदर्शन हिंसात्मक बनेको हो ।

नयाँ बानेश्वरतर्फ अघि बढ्न खोजेका राजावादीलाई रोक्न प्रहरीले बल प्रयोग गरेको छ । बल प्रयोगका क्रममा प्रहरीले राजावादीमाथि अश्रुग्यास प्रहार गरिरहेको छ ।

प्रदर्शनकारीहरू सुरक्षाकर्मीमाथि ढुंगा र इँटा प्रहार गरिरहेका छन् । तीनकुनेमा रहेका खबरहबकर्मी संगम ढकालका अनुसार प्रहरी र प्रदर्शनकारीबीचको झडपका क्रममा केही व्यक्ति घाइते भएका छन् ।

खबरहबले कैद गरेको एक भिडियो फुटेजमा एकजना सादा पोसाक लगाएका व्यक्ति बेहोस देखिएका छन् । उनीबारे विस्तृत विवरण खुलेको छैन ।