काठमाडौं- तेजाव आक्रमण पीडित मुस्कान खातुनले नेपाली कम्युनिस्ट पार्टीमा राजनीति थालेकी छन् ।

बिहीबार राष्ट्रिय सभा गृहमा आयोजित पार्टी एकता घोषणा सभामा खातुन नेपाली कम्युनिस्ट पार्टीमा प्रवेश गरेकी हुन् । उनलाई उक्त पार्टीको केन्द्रीय सदस्य बनाउने तयारी नेताहरूले गरेका छन् ।

मुस्कानसहित जसपा संघीय परिषद् अध्यक्ष राजेन्द्र श्रेष्ठलाई पनि नेकपा संयोजक पुष्पकमल दाहाल प्रचण्डलगायत नेताहरूले स्वागत गरे ।

नेकपाका सहसंयोजक माधवकुमार नेपालले मुस्कानलाई खातुनलाई केन्द्रीय सदस्य बनाउने घोषणा गरे ।  खातुन मानव अधिकारकर्मीका रुपमा चर्चित छिन्।

वीरगन्ज महानगरपालिका-३, छपकैयाकी मुस्कानलाई २०७६ भदौ २० गते शुक्रबार स्कुल जाँदै गर्दा गाउँकै केटाहरूले तेजाव प्रहार गरेका थिए।

तेजाव हान्ने दुई जनालाई प्रहरीले पक्राउ गरेको थियो। पक्राउ पर्ने शमसाद मिया र माजिद आलम दुवै १६ वर्षका स्थानीय हुन्। शमसादले आफ्नो प्रेम प्रस्ताव अस्वीकार गरेको झोंकमा तेजाब हानेका थिए ।

उनको जीउको दाहिने भाग पूरै तेजाबले जलेको थियो। लामो उपचारपछि उनी निको भएर मानवअधिकारकर्मीका रुपमा सक्रिय थिइन् ।