काठमाडौं– जेन–जी कोशी (प्रदेश १) का संयोजक उपार्जन चाम्लिङले आफू कुनै पनि हिंसात्मक गतिविधिमा संलग्न नभएको बताएका छन् । 

उनले सामाजिक सञ्जाल फेसबुकमार्फत एक प्रेस विज्ञप्ति जारी गर्दै शुक्रबार खबरहबबाट प्रकाशित ‘उपत्यका प्रहरी कार्यालयको गाडीमा खुकुरी हानिरेहका थिए जेन-जी का कोशी संयोजक’ शीर्षकको समाचारप्रति ध्यानाकर्षण भएको भन्दै जेन-जी आन्दोलनका क्रममा आफू कतै पनि संलग्न नरहेको र कुनै पनि हिंसात्मक गतिविधिमा आफ्नो भूमिका नरहेको उल्लेख गरेका छन् ।

उनले उक्त समाचारले आफ्नो व्यक्तिगत प्रतिष्ठा, सामाजिक छवि र पेशागत जीवनमाथि गम्भीर धक्का पुर्‍याएकाे भन्दै समाचारको खण्डन समेत गरेका छन् ।

उनले विज्ञप्तिमा भनेका छन्– ‘नेपालको संविधानले प्रत्येक नागरिकलाई मौलिक हकका रूपमा सम्मानपूर्वक बाँच्ने अधिकार, स्वतन्त्रताको उपयोग गर्ने अधिकार र आफ्ना विचार अभिव्यक्त गर्ने अधिकार सुनिश्चित गरेको छ। तर यी अधिकार अरूको प्रतिष्ठा र मर्यादाको हनन गर्ने आधार बन्न सक्दैनन्।’

खबरहबले शुक्रबार प्रहरी स्रोतको सूचनाका आधारमा जेन-जी आन्दोलनका क्रममा उपत्यका प्रहरी कार्यालयको गाडीमा खुकुरी हानिरहेका व्यक्ति जेन–जीका कोशी संयोजक भएको उल्लेख गरेको थियो ।