काठमाडौँ- प्रमुख सत्तारुढ नेकपा एमालेका केन्द्रीय सदस्य ऐन महर हाजिरी जमानीमा छुटेका छन् ।

एकजना महिलाले हुलाकबाट दिएको गाली बेइज्जतीसम्बन्धी उजुरीका आधारमा पक्राउ पुर्जी जारी भएपछी नेपाल प्रहरीको साइबर ब्युरोमा बुधबार उपस्थित भएका उनलाई म्याद थपका लागि अदालत लगिएको थियो ।

बझाङकी एकजना महिलाले हुलाकबाट पठाएको जाहेरी दर्ता गरेपछि साइबर ब्युरोले जिल्ला अदालत काठमाडौँमार्फत् गत भदौ ९ गते पक्राउ पुर्जी जारी गरेको थियो । तर बुधबार दिउँसो साइबर ब्युरोले नियन्त्रणमा लिएका उनलाई जिल्ला सरकारी वकिलको कार्यालयले बयानपछि हाजिरी जमानीमा छाडेको हो ।

उनलाई म्याद थपका लागि काठमाडौँ जिल्ला अदालतमा पेश गरेर बयानका लागि जिल्ला सरकारी वकिलको कार्यालयमा लगिएको थियो । जहाँबाट सरकारी वकिलले हाजिरी जमानीमा छाडिदिएका हुन् ।

उक्त पक्राउ पुर्जी जारी भएपछि महर बुधबार भोटाहिटीस्थित साइबर ब्युरोमा उपस्थित भएका महरलाई त्यहीँबाट नियन्त्रणमा लिइएको थियो । उनीविरुद्ध सामाजिक सञ्जालमार्फत् आफ्नो चरित्र हत्या गरेको भन्दै बझाङकै एक महिलाले जाहेरी दिएकी थिइन् ।

महर एमालेको भ्रातृसंगठन अनेरास्ववियुको अध्यक्ष हुँदै एमालेको केन्द्रीय सदस्य भएका थिए । बझाङ निवासी महर २०७९ सालको निर्वाचनमा संघीय सांसदका उमेदवार भएका थिए । त्यसबेला उनी नेकपा (एकीकृत समाजवादी) पार्टीका नेता भानुभक्त जोशीसित पराजित भए ।