काठमाडौं– बागमती प्रदेश सरकारले सवारी दुर्घटना न्यूनीकरण र ट्राफिक सचेतता अभिवृद्धिका लागि ‘नो हेलमेट, नो फ्युल’ अभियान सञ्चालन गर्ने भएको छ । 

मुख्यमन्त्री तथा मन्त्रिपरिषद्को कार्यालयमा बुधबार भएको छलफलमा दुर्घटना न्यूनीकरण र ट्राफिक सचेतता अभिवृद्धिका लागि ‘नो हेलमेट, नो फ्युल’ अभियान सञ्चालन गर्ने निष्कर्ष निकालिएको हो । 

दुईपाङ्ग्रे सवारीसाधन प्रयोगकर्ताले हेल्मेट अनिवार्य रूपमा प्रयोग गर्ने कानुनी व्यवस्थालाई कडाइका साथ पालना गराउन ‘नो हेलमेट, नो फ्युल’ अभियान सञ्चालन गरिन लागेको मुख्यमन्त्री इन्द्रबहादुर बानियाँको सचिवालयले जनाएको छ । 

सचिवालयका अनुसार अभियानअन्तर्गत हेल्मेट नलगाई इन्धन लिन आउने दुई पाङ्ग्रे सवारीसाधनलाई इन्धन नदिन नेपाल आयल निगम र नेपाल पेट्रोलियम डिलर्स एशोसियसनलाई पत्राचार गरिने भएको छ । 

यस्तै अभियान कार्यान्वयन गर्न र अभियानको निगरानीका लागि प्रदेशअन्तर्गतका जिल्ला प्रशासन कार्यालयहरू र सुरक्षा निकायहरूलाई पनि पत्राचार गरिने छ । 

उक्त छलफलमा  नेपाल पेट्रोलियम डिलर्स राष्ट्रिय एशोसियसनको बागमती प्रदेशले सम्बन्धित निकायहरूसँग समन्वय गरेर पेट्रोल पम्पहरूमा ‘नो हेल्मेट, नो फ्युल’को सन्देशमूलक बोर्ड (निश्चित आकार र त्यसभित्र रहने विषय र बोर्ड राख्ने स्थान एकीन निर्णय गरी) राख्ने व्यवस्था मिलाउने भएको छ ।