काठमाडौं– प्रत्येक वर्ष सामाजिक सुरक्षा तथा विपद् संवेदनशील सामाजिक सुरक्षासम्बन्धी विषयमा उत्कृष्ट समाचार लेख्ने पत्रकारलाई सम्मान गरिने भएको छ । 

सञ्चारकर्मीहरूका लागि आयोजित सामाजिक सुरक्षा तथा विपद् संवेदनशील सामाजिक सुरक्षासम्बन्धी अभिमुखीकरण समापनका अवसरमा सामाजिक सुरक्षा नागरिक समाज सञ्जालका अध्यक्ष तिलोत्तम पौडेलले यससम्बन्धी विषयमा उत्कृष्ट समाचार लेख्ने पत्रकारलाई प्रत्येक वर्ष पुरस्कार दिने घोषणा गरे । शुक्रबारदेखि सुरु भएको अभिमुखीकरण शनिबार समापन भएको हो । 
 
कार्यक्रमको शुभारम्भ गर्दै राष्ट्रिय योजना आयोगका सदस्य डा प्रकाशकुमार श्रेष्ठले ‘नेपालको सामाजिक सुरक्षाको समग्र अवस्था’ का विषयमा प्रस्तुति दिएका थिए । यसका सकारात्मक प्रभाव धेरै रहेकाले सामाजिक सुरक्षाका कमी कमजोरी सच्याउँदै जानुपर्नेमा उनले जोड दिएका थिए । 

राष्ट्रिय परिचयपत्र तथा पञ्जीकरण विभागका निर्देशक सानुबाबु अधिकारीले ‘गैह्र योगदानमा आधारित सामाजिक सुरक्षा, कानुनी प्रावधान र तथ्याङ्क व्यवस्थापन’ विषयमा पत्रकारलाई जानकारी गराएका थिए ।

सामाजिक सुरक्षा कोषका उपनिर्देशक रोहित रेग्मीले ‘योगदानमा आधारित सामाजिक सुरक्षा हालको अवस्था र नीतिगत प्रावधान’, सेभ द चिल्ड्रेनका हेमन्त दङ्गालले ‘विपद् संवेदनशील सामाजिक सुरक्षा अवधारणा’, राष्ट्रिय विपद् जोखिम न्यूनीकरण तथा व्यवस्थापन प्राधिकरणका उपसचिव गोमादेवी चेम्जोङले ‘विपद् संवेदनशील सामाजिक सुरक्षा तथा राहत वितरण मापदण्ड’, पिआइएनका कार्यक्रम व्यवस्थापक नवीन श्रेष्ठले ‘विपद् वित्तीय व्यवस्थापन’ र कान्तिपुर टेलिभिजनका सम्पादक विजय पौडेल र सेभ द चिल्ड्रेनका अरुण राईले ‘सञ्चारको भूमिका: सामाजिक सुरक्षा अधिकारको प्रवर्द्धन, प्रमाण सङ्कलन र नीति प्रभाव’ विषयमा प्रस्तुति दिएका थिए ।

नेपालमा प्रत्येक आर्थिक वर्षमा सामाजिक सुरक्षा शीर्षकमा दुई खर्ब ५० अर्ब रुपैयाँ बजेट खर्च हुने गरेको जनाइएको छ । सामाजिक सुरक्षा क्षेत्रमा भएका समस्या समाधानका लागि सञ्चारकर्मीले निरन्तर रूपमा समाचार सामग्री सम्प्रेषण गर्नुपर्नेमा सबै प्रस्तोताहरूले जोड दिएका थिए ।