काठमाडौं – नेकपा माओवादी केन्द्रका नेता तथा सांसद वर्षमान पुनले संसदमा गृहमन्त्री रमेश लेखकको राजीनामा माग गरेका छन् । भिजिट भिसा प्रकरणमा गृहमन्त्रीको सचिवालयसमेत आरोपित भएकाले निष्पक्ष छानबिनका लागि मार्ग प्रशस्त गर्न आग्रह गरे ।

‘स्वयम् गृहमन्त्रीज्यूले नै सरुवा गरेको व्यक्ति कार्यालय प्रमुख रहेका छन् । उहाँको सचिवालय तानिएको छ । अख्तियारले छापा मारेको छ । स्टिङ अप्रेशन गरेको छ । सामान्य मान्छे पक्राउ गरेर सानो माछो दुई दिनपछि छाडिएको छ । ठूलो माछा को हो ? स्वयम् अख्तियारले नै भनिरहेको छ ।’ संसदमा नेतान पुनले भने, ‘अहिले नै हामी कसैलाई आरोपित गर्न चाहाँदैनौं । यो सबै सन्दर्भमा अनुसन्धान गर्ने सबै निकाय गृहमन्त्रीज्यूको मातहतमा रहेका छन् । सम्पत्ति शुद्धीकरण होला, सिआईबी होला अरु धेरै निकायहरू । यस सन्दर्भमा माननीय गृहमन्त्रीज्यूले राजीनामा दिएर अनुसन्धानका लागि मार्ग प्रशस्त गरिदिन हुन हाम्रो विनम्र अनुरोध छ । उहाँको संलग्नता छ भनेर हामी आरोपित गर्न चाहान्नौं ।’

नेता पुनले गृहमन्त्रीको ब्याकग्राउण्ड हेर्दा कानून, मानवअधिकार शान्ति प्रक्रियाका विभिन्न शृङ्खलामा काम गरेको व्यक्ति र आफ्नो दलको प्रमुख सचेतक भएर संसदका विभिन्न विषयहरू हेण्डल गरेको भन्दै उनले अघिल्लो सेसनमा गृुहमन्त्री प्रतिपक्षी बेञ्चमा बसेर धेरै नेता र मन्त्रीहरूमाथि नैतिकताका विषय उठाएको बताए ।

‘हामीलाई कुनै नेता र पार्टीप्रति अविश्वास फैलाउन हामीलाई रुचि छैन । गम्भीर विषय उठेपछि गृहमन्त्रीले मार्ग प्रशस्त गरी निष्पक्ष छानबिन गर्ने वातावरण बनाइदिन अनुरोध गर्दछौं । यो अवस्था नबन्दासम्म हामी सम्पूर्ण प्रतिपक्षको तर्फबाट नियमित प्रक्रिया अगाडि बढाउन दिन सक्दैनौं ।’