लाहोर – लगातार दुई खेलमा पराजित भएसँगै इंग्ल्यान्ड च्याम्पियन्स ट्रफीको समूह चरणबाट एक खेल बाँकी हुँदै बाहिरिएको छ । गएराति लाहोरमा भएको अफगानिस्तानसँगको खेलमा ८ रनले पराजित भएसँगै इंग्ल्यान्डको दोस्रो चरण प्रवेशको सम्भावना सकिएको हो ।

टस जितेर सुरुमा ब्याटिङ गरेको अफगानिस्तानका लागि इब्राहिम जाद्रानले १४६ बलमा १७७ रनको पारी खेले । सानदार र ऐतिहासिक शतकका लागि उनले १२ चौका र ६ छक्का हिर्काए । उनको सनसनीपूर्ण शतकका साथमा अफगानिस्तानले ७ विकेटको क्षतिमा इंग्ल्यान्डलाई ३२६ रनको चुनौती दिएको थियो ।

अफगानिस्तानविरुद्ध इंग्ल्यान्डका लागि जोफ्रा आर्चरले तीन विकेट हात पार्दा लियाम लिभिङस्टोनले दुई विकेट लिए।

रोचक र सनसनीपूर्ण बनेको खेलमा जवाफी ब्याटिङ गरेको इंग्ल्यान्डका लागि जो रुटले शतकीय पारी खेले । उनले १११ बलको सामना गर्दै ११ चौका र १ छक्काको मद्दतमा १२० रन बनाए । त्यो अफगानिस्तानविरुद्ध जितका लागि पर्याप्त भएन । इंग्ल्यान्डको मध्यक्रम चल्न नसक्दा अफगानिस्तानसँग पराजित भएको हो । ३१७ रन बनाएको इंग्ल्यान्ड ४९.५ बल खेल्दा अलआउट भएको हो ।

इंग्ल्यान्डमाथि सनसनीपूर्ण जित निकाल्न अफगानिस्तानका लागि अजमातुल्लाह उमरजाईले पाँच विकेट लिए भने मोहम्मद नाबीले दुई विकेट हात पारे ।

समूह ‘बी’मा इंग्ल्यान्डको लगातार दुई हारसँगै दोस्रो चरणको सम्भावना सकिएको छ । समूह चरणको अन्तिम खेलमा इंग्ल्याण्डले दक्षिण अफ्रिकासँग प्रतिस्पर्धा गर्नेछ ।

समूह ‘बी’मा समान तीनतीन अंक भए पनि रनरेटका आधारमा दक्षिण अफ्रिका शीर्ष स्थानमा छ भने अस्ट्रेलिया दोस्रो स्थानमा छ । दुई अंक जोडेको अफगानिस्तान तेस्रो स्थानमा छ।