काठमाडौं– नेपाली कांग्रेसका सभापति शेरबहादुर देउवाले पार्टीका तर्फबाट सरकारमा सहभागी मन्त्रीहरूलाई सांसदहरूसँग समन्वय गरेर काम गर्न निर्देशन दिएका छन् । 

संसदीय दलको सोमबारको बैठकमा दलको नेतासमेत रहेका सभापति देउवाले सरकारमा सहभागी मन्त्रीहरूलाई पार्टीबाट निर्वाचित सांसदहरूसँग समन्वय गरेर काम गर्न निर्देशन दिएका हुन् । 

‘सभापतिज्यूले अन्तिममा मन्त्रीज्यूहरूको काम अलिकति अप्ठ्यारो त होला तर, सांसदहरूसँग समन्वय गरेर काम गर्न निर्देशन दिनुभयो,’ बैठकपछि कांग्रेस सांसद रामहरि खतिवडाले भने । 

उनका अनुसार सभापति देउवाले बैठकमा वर्तमान गठबन्धनको सरकार ७ बुँदे सहमतिअनुसार निरन्तर जाने कुरामा विवाद नरहेको पनि बताए । देउवाले सांसदहरूलाई सरकारले काम गर्ने क्रममा गल्ती गरे खुलेर कुरा राख्न पनि भनेका छन् ।      

‘गठबन्धनको सरकार हाम्रो ७ बुँदे सहमतिअनुसार निरन्तर जाने कुरामा विवाद छैन । तर, गल्ती भयो भने गल्ती भएका कुराहरू खुलेर राख्न सभापतिले पनि भन्नुभएको छ,’ खतिवडाले भने, ‘माननीय सदस्यहरूले पनि कुरा उठाएका छन् ।’

उनले बैठकमा पार्टीका आन्तरिक कुरा, अनुशासनका कुरासँगसँगै सांसदहरूले कहाँ कसरी बोल्ने भन्नेबारेमा पनि कुराहरू उठेको जानकारी दिए ।