काठमाडौं- प्रमुख सत्तारुढ नेपाली कांग्रेस संसदीय दलको बैठक संसद् भवन नयाँबानेश्वरमा बसिरहेको छ । सोमबार बसेको बैठकका क्रममा करिब १८ जना सांसदले बोलेको प्रमुख सचेतक श्यामकुमार घिमिरेले बताएका छन् ।

सोमबारको बैठकमा मुख्यत: माघ १८ गतेदेखि सुरु हुने संघीय संसद् अधिवेशनबारे कुरा भएकव घिमिरले बताए।

‘त्यो विषयलाई लिएर छलफल भएको छ । अध्यादेशका विषयहरू, बटजेटका विषयहरू र अन्य समसामयिक विषयहरूमा सांसदहरूले कुरा उठाउनुभएको छ’, उनले भने, ‘अत्यन्तै गम्भीरतापूर्वक र सौहार्दपूर्ण वातावरणमा छलफल भएको छ ।’

घिमिरेले दलको बैठकमा कुनै पनि सांसदले सरकार फेर्ने विषयमा कुरै नगरेको बताए । ‘अहिले सरकार चेन्जको कुरै नगरौँ । सरकार चेन्जको कुरा कसैले गरेको छैन । सरकार चेन्ज हुने कुनै सम्भावना पनि छैन’, उनले भने, ‘यो कोलिसन संसद्को बाँकी अवधिसम्म पूरै चल्नेवाला छ । ७ बुँदे सम्झौता बमोजिम नै यो आफ्नो गतिमा अगाडि बढ्छ । त्यही सम्झौतालाई हुबहु कार्यान्वयन गर्दै अघि बढ्छ ।’

असार १७ गते राति भएको त्यही सात बुँदे सहमतिलाई मार्गनिर्देशक सिद्धान्तका रुपमा लिएर संसद्को अवधिभरि नेपाली कांग्रेस र एमाले मिलेर सरकार चलाउने कुरा भएको पनि घिमिरेले जानकारी दिए ।