भक्तपुर- प्रधानमन्त्री केपी शर्मा ओलीले आफूलाई रुघाखोकी लागेर बालुवाटारमा आराम गरिरहँदा आईसीयूमा रहेको पुरानो फोटो भाइरल गर्ने गरिएको बताएका छन् ।

भक्तपुरको सूर्यविनायक नगरपालिकाको कटुञ्जेस्थित नवनिर्मित प्रशासकीय भवनको सोमबार उद्घाटनका क्रममा ओलीले यस्तो बताएका हुन्
।

उनले बालुवाटारमा आराम गरेर बस्दा पनि आईसीयुमा रहँदाको फोटो सार्वजनिक गरेर भ्रम फैलाइएकोको बताए ।

‘मलाई रुघाखोकी लागेको हो । एन्टीबायोटिकले अलिक कमजोर बनाएको छ’, उनले भने, ‘तर हाँच्छ्यु गरेको देख्यो भने आईसीयू कक्षकमा बसेको फोटो आइहाल्छ । खोक्न पाएको छैन, आईसीयूमा बसेको देखाउँछन् ।’

प्रधानमन्त्री ओलीले सरकारको विरोध गर्ने नाममा सीमित संख्या भएकाले मोर्चा र शक्ति बनाएँ भनेर चेतावनी दिनेहरूको भ्रमबाट मुक्त हुन आग्रह गरे ।

प्रधानमन्त्री ओलीले फरक प्रसंगमा पूर्वसहमतिअनुसार अहिले आफूले कांग्रेसबाट पूरा साथ पाएको बताए । उनले भोलि कांग्रेस नेतृत्वको सरकारलाई पनि एमालेले पूरा साथ दिने स्पष्ट पारे ।

उनले संसदको हिउँदे अधिवेशनलाई कानुन निर्माणका धेरै काम दिने पनि बताउँदै सहमति भए छिट्टै संविधान संशोधन हुने उल्लेख गरे । यदि सहमति नभएमा केही समय लाग्ने उनले स्पष्ट पारे ।