तेह्रथुम – पूर्वी पहाडको भ्रमणमा निस्किएका पूर्वप्रधानमन्त्री प्रचण्डले आइतबार तेह्रथुमको लालीगुराँस नगरपालिकाको केन्द्र बसन्तपुर बजारमा रहेको चोलुङ पार्क र युमा संग्रहालयको अवलोकन गरेका छन् ।

चोलुङ पार्कका परिकल्पनाकार एवं लालीगुराँस नगरपाकिलाका मेयर अर्जुनबाबु माबुहाङले माओवादी अध्यक्ष प्रचण्डलाई पार्कमा रहेका ऐतिहासिक सामग्रीहरु र लिम्बु समुदायका सांस्कृतिक पहिचानका विषयमा जानकारी गराए ।

नेकपा माओवादीका अध्यक्षमसमेत रहेका प्रचण्डले युमा संग्रहालयमा संग्रहित सामग्रीहरु महत्वपूर्ण रहेको भन्दै पार्क र संग्रहालय निर्माणमा योगदान गरेकोमा माबुहाङलाई धन्यवाद दिए ।

संयोग कस्तो परेको छ भने दोस्रो संविधानसभाको चुनावका बेला प्रचण्ड तेह्रथुमको जिरखिम्ती आएका बेला अर्जुनबाबु माबुहाङ प्रचण्डको हातबाट टीका र खादा लगाएर नेकपा माओवादी केन्द्रमा प्रवेश गरेका थिए ।

तर, आम निर्वाचनपछि उनी आफ्नै मातृ पार्टी नेपाली कांग्रेसमा फर्किए । ०७४ को स्थानीय चुनावमा उनी कांग्रेसका तर्फबाट लालीगुराँसको मेयरमा विजयी बने । ०७९ को चुनावमा माबुहाङ कांग्रेसबाट दोस्रोपटक मेयरमा निर्वाचित भए ।

भनिन्छ, १२ वर्षपछि खोलो फर्किन्छ । ११ वर्षअघि तेह्रथुममै प्रचण्डको हातबाट माला लगाएर प्रचण्डलाई आइतबार बसन्तपुर बजारमा अर्जुनबाबु माबुहाङले खादा र ढाकाटोपी लगाइदिए ।

पार्क र संग्रहालयको अवलोकनपछि आयोजित कार्यक्रममा बोल्दै प्रचण्डले एक दशकअघिको घटना सम्झिए । ‘अर्जुन माबुहाङजी पहिले हामीसँगै हुनुहुन्थ्यो,’ प्रचण्डले भने, तर यता (कांग्रेसमा) आएर पनि राम्रो गर्नुभएको छ, उहाँलाई बधाइ छ ।’

प्रचण्ड र वर्षमान पुनको टोली नेपाली सेनाको हेलिकोप्टरमा आइतबार बिहान बसन्तपुर बजार ओर्लिएको हो । त्यहाँबाट उनको टोली हेलिकोप्टरमै लसुने पुगेको छ ।

लसुनेमा ६ जना सहिद भएको स्थान धनरुपा स्मृति पार्क र सभाहलको शिलान्यास गरेर उनी आठराई जाने कार्यक्रम छ । आठराईमा पनि शालिक अनावरण लगायतका कार्यक्रमहरु रहेको जनाइएको छ ।