काठमाडौं- सशस्त्र प्रहरीले त्रिभुवन अन्तर्राष्ट्रिय विमानस्थलबाट १० किलो ९६० ग्राम गाँजासहित चारजना भारतीय नागरिकलाई पक्राउ गरेको छ । सशस्त्र प्रहरी नायब महानिरीक्षक तथा प्रवक्ता मनिष थापाका अनुसार उनीहरूलाई शुक्रबार पक्राउ गरिएको हो ।

थाइल्यान्डको बैंककहुँदै एयर एसियाको उडान नं. एफडी १८२ को जहाजमा काठमाडौं आएका उनीहरूलाई शुक्रबार दिउँसो करिब २ बजे सशस्त्र प्रहरी बल नेपाल त्रिभुवन अन्तर्राष्ट्रिय विमानस्थल भन्सार सुरक्षा बेस गौचर काठमाडौंले गाँजासहित नियन्त्रणमा लिएको हो ।

उनीहरूले ल्याएको लगेजमा कफी र चक्लेटको प्याकेटभित्र लुकाई छिपाई राखेको उक्त गाँजा सशस्त्र प्रहरी बलको टोलीले नियन्त्रणमा लिएको थापाले जानकारी दिएका छन् । उनीहरू चारै जनालाई बरामद गाँजासहित आवश्यक कारबाहीको लागि सम्बन्धित निकायमा बुझाइएको थापाले जानकारी दिए ।