काठमाडौं– कालीमाटी फलफूल तथा तरकारी बजारमा बिक्रीका लागि राखिएको रायोको सागमा आज पनि विषादी भेटिएको छ ।  

केन्द्रीय कृषि प्रयोगशाला अन्तर्गतको विषादी अवशेष द्रुत विश्लेषण प्रयोगशाला इकाइले गरेको परीक्षणमा रायोको साग उपभोग अयोग्य रहेको पाइएको हो । प्रयोगशालाको प्रतिवेदन अनुसार रायोको सागको नमुनामा कार्बामेट १५.२९९ प्रतिशत र अर्गानोफस्फेट ५४.९२९ प्रतिशत विषादी अवशेष भेटिएको छ। मापदण्ड अनुसार ४५ प्रतिशतभन्दा बढी विषादी भेटिएमा उपभोग अयोग्य मानिने व्यवस्था छ।

उक्त रायोको साग कालीमाटी फलफूल तथा तरकारी बजार विकास समितिको बजारमा बिक्रीका लागि राखिएको थियो। परीक्षणपछि सम्बन्धित निकायलाई जानकारी गराइएको प्रयोगशालाले जनाएको छ । पछिल्लो समय कालीमाटी बजारमा बिक्री हुने तरकारीमा बारम्बार विषादी भेटिँदै आएको छ । 

यसअघि पुष ८ गते पनि रायोको सागमा ९९.०८ प्रतिशत विषादी भेटिएको थियो । सरोकारवालाहरूले विषादीको अनियन्त्रित प्रयोग रोक्न, नियमित अनुगमन बढाउन र उपभोक्ताको स्वास्थ्य सुरक्षामा गम्भीर ध्यान दिन सरकारसँग माग गरेका छन् ।