काठमाडौं – नेपाली युवा राजनीतिज्ञ सागर ढकालले प्रधानमन्त्री पदलाई मासुको टुक्रा बनाउनु नहुने बताएका छन्। बिहीबार काठमाडौं महानगरपालिकाका प्रमुख बालेन्द्रसँग वैकल्पिक राजनीतिक क्षेत्रका अगुवाको भेटपछि उनले यस्तो बताएका हुन्।

ढकालले देशको नेतृत्व पाँच वर्ष गर्न पाउनुपर्ने भन्दै यस्तो बताएका हुन्। उनले अस्थिरता, व्यक्तिगत इच्छा आकांक्षा जनताका लागि पुगेको भन्दै सामाजिक सञ्जालमा लेखेका छन्, ‘प्रधानमन्त्री पद मासुको टुक्रा बनाउनु हुँदैन। जो हुने हो हुनुस् तर ५ बर्षमा कुनै सम्झौता नगर्नुस। मैले सबैलाई भन्ने यही हो। अस्थिरता, व्यक्तिगत इच्छा आकांक्षा अब हाम्रो लागि पुग्यो‌।’

छलफलमा समय लाग्नु स्वभाविक भएको भन्दै उनले प्रधानमन्त्रीलाई कमजोर बनाएर हटाउँदै आफू फेरि बन्ने रोगको अन्त्य हुनुपर्नेमा जोड दिएका छन्। उनले अगाडि लेखेका छन्, ‘समय लाग्नु स्वाभाविक हो। ७५ वर्षको समस्या जो हल गर्नु छ। अब जो प्रधानमन्त्री हुन्छ ५ वर्षको लागि हुन्छ। प्रधानमन्त्रीलाई‌ कमजोर बनाएर हटाएर फेरि आफू हुने रोग सदियौँ देखिको हो। यो अब अन्त्य हुनुपर्छ र हुन्छ।’

ढकालले सबैलाई भगवानले आफू होइन देश सोच्ने शक्ति दिनुपर्नेमा जोड दिएका छन्। उनले अन्तिममा लेखेका छन्, ‘अब देश सोचौँ। भगवानले हामी सबैलाई आफू होइन, देश सोच्ने शक्ति दिउन्।’