काठमाडौं- नेपाली कांग्रेसको विशेष महाधिवेशनको पक्षका नेताहरुले नयाँ नीति र नेतृत्वका साथ पार्टी निर्वाचन होमिनुपर्ने बताएका छन् ।

नेपाली कांग्रेस विशेष महाधिवशेनका सन्दर्भमा बुधबार काठमाडौंमा आयोजित सभामा उनीहरुले पुराना गल्ती कमजोरीलाई सुधार गर्दै विधान संशोधन गरि नयाँ नीति र नेतृत्वका साथ पाटी निर्वाचनमा होमिनुपर्ने बताएका हुन् ।

सभामा कांग्रेस नेता गुरु घिमिरेले विशेष महाधिवेशन माग गर्दै बुझाइएको हस्ताक्षरको अवमूल्यन नगर्न सुझाव दिए। उनले मंसिर मसान्त वा पुस पहिलो साता विशेष महाधिवेशन गर्दै नयाँ नेतृत्व र नीतिका साथ पार्टीलाई अघि बढाउनुपर्नेमा जोड दिए ।

घिमिरेले समयमा महाधिवशेन नगर्ने नियतका साथ पार्टीको केन्द्रीय कार्यसमिति बैठक लम्ब्याइएको आरोप लगाएका छन्।

उनले विशेष महाधिवेशनका लागि सभापति शेरबहादुर देउवाले पनि सहजीकरण गर्नुपर्ने भन्दै महाधिवेशनपछि देउवालाई सम्मानित नेताका रुपमा अघि बढाउने जिकिर गरे ।

पार्टीलाई एकताबद्ध बनाएर अघि बढ्नका लागि विशेष महाधिवेशनको माग गरिएको पनि उनले बताएका छन् ।

त्यस्तै अन्य नेताहरूले अब बस्ने केन्द्रीय समिति बैठकले विशेष महाधिवेशनको निर्णय गर्नुपर्ने बताए ।

उनीहरूले विशेष महाधिवेशन माग गर्दै हस्ताक्षर गर्नेहरूमाथिको अपमान स्वीकार्य नहुनेसमेत जनााएका छन् ।

कांग्रेसका गण्डकी प्रदेश सभापति शुक्रराज शर्माले आफूहरूलाई जिम्मेवारी दिए एक महिनामै महाधिवेशन गर्ने बताए । उनले नियमित महाधिवेशन नै एक महिनाको तयारीले गर्न सकिने जिकिर गरे ।

‘म गण्डकी प्रदेशको सभापति हुँ, केही कारणले महाधिवेशन गर्न नसकिने मलाई लाग्दैन। हामीलाई जिम्मेवारी दिनु, एक महिनामै सबै प्रक्रिया पुर्‍याएर महाधिवेशन गर्छौं ।’

उनले जो सभापति बने पनि अहिलेको अवस्था हल गरेर जानुपर्नेमा जोड दिए गल्ती नदोहोर्‍याउने प्रतिबद्धतासहित महाधिवेशन गरेर जनतामा जानुपर्ने उनको मत थियो ।