धनगढी- सुदूरपश्चिमको राजधानी धनगढीमा नेकपा एमालेनिकट युवा संघ नेपालका कार्यकर्ताहरूले नाराबाजी गरिरहेका जे-नजी युवाहरूलाई कुटपिट गरेका छन्।

धनगढी बजारको कभर्डहल अगाडि एमाले पोलिटब्युरो सदस्य महेश बस्नेतविरूद्ध चर्को नाराबाजी गरिरहेका २४ जना बढी जेन-जीको समूहमाथि युवा संघका कार्यकर्ता जाइलागेका हुन् ।

बस्नेतको बिरोधमा सडकमा प्लेकार्डसहित चर्को नाराबाजीसहित प्रदर्शनरत जेन-जीहरूलाई मोटरसाइकलमा आएका युवा संघका कार्यकर्ताले कुटपिट गरेका हुन्।

कुटपिटबाट धनगढी उपमहानगरपालिका-४ की जेन-जी नेतृ सरिता जोशीको हातमा चोट लागेको छ। जोशीलाई निसर्ग अस्पतालमा लगिएको छ। आक्रमणमा गोपाल बोहरा लगायत युवा पनि सामान्य घाइते भएका छन् ।

जेन-जीहरूले प्रहरीले आफ्नो सुरक्षा नगरेको गुनासो गरेका छन् । युवा संघका कार्यकर्ताहरूलाई आफूहरूमाथि आक्रमण गर्न प्रहरीले छाडिदिएको उनीहरूको गुनासो छ।

महेश बस्नेत र एमाले उपमहासचिव पृथ्वी सुब्बा गुरुङ धनगढीमा उत्रिँदा सम्भावित झडप हुन नदिन होटल डिभोटी र कभर्डहल क्षेत्रमा नेपाल प्रहरी र सशस्त्र प्रहरी तैनाथ थिए।