काठमाडौं– नारायणगढ–मुग्लिन सडकखण्डमा फसेका ५ सय ५० यात्रुलाई निःशुल्क घुम्ती बस सेवामार्फत गन्तव्यसम्म पुर्‍याइएको जिल्ला प्रहरी कार्यालय चितवनले जनाएको छ ।

तुइन खोला पहिरोमा फसेका यात्रुहरूको उद्धारका लागि मंगलबारदेखि सुरु गरिएको निःशुल्क घुम्ती बस सेवा  बिहीबार साँझ ७ बजेसम्म सञ्चालन गरिएको थियो। 

पहिरोमा अलपत्र परेका यात्रुलाई नारायणगढ, भरतपुरसम्म ल्याई सहजीकरण गरेको प्रहरी निरीक्षक दीपक रिजालले जानकारी दिए । 

‘तनहुँतर्फको बाटो हुँदै पाँच किलोको पुलसम्म पुगेका यात्रुहरूलाई लक्षित गरेर बससेवा सञ्चालनमा ल्याइएको थियो, अलपत्रमा परेका चालक तथा यात्रुलाई जिल्ला प्रशासन कार्यालय चितवनको समन्वयमा खाद्यान्न र प्राथमिक उपचार लागि समेत समन्वय गरेका थियौं’ उनले भने ।  

बिहीबार राती करिब १० बजेबाट भने पहिरो हटाएर दुईतर्फी रुपमा उक्त खण्ड सञ्चालनमा आइसकेको छ ।