झापा – यही साउन ६ गते आगलागीमा परी घाइते भएका हल्दिबारी गाउँपालिका-४ का ६० वर्षीय पुण्यप्रसाद ओलीको उपचारका क्रममा आज मृत्यु भएको छ ।

उनको काठमाडौं कीर्तिपुरस्थित बर्न अस्पतालमा आज उपचारका क्रममा मृत्यु भएको जिल्ला प्रहरी कार्यालयका सूचना अधिकारी खगेन्द्रबहादुर खड्काले बताए । साउन ६ गते बिहान आफ्नै घरको भान्साकोठामा रोटी पकाउने ग्यास सिलिन्डरबाट सल्किएको आगो निभाउने क्रममा ओलीसहित एकै परिवारका पाँच जना घाइते भएका थिए ।

सो घटनामा ओलीसहित उनकी ५९ वर्षीया पत्नी गोमादेवी ओली, जेठो छोरा ३३ वर्षीय सन्तोष ओली, जेठी बुहारी ३२ वर्षीया अनिता ओली र कान्छो छोरा २० वर्षीय आर्यन ओली घाइते भएका सूचना अधिकारी खड्काले जानकारी दिए ।

भद्रपुरको ओमसाई पाथीभरा हस्पिटलमा प्रारम्भिक उपचारपछि चिकित्सकको सल्लाहअनुसार पुण्यप्रसाद र बुहारी अनितालाई थप उपचारका लागि हेलिकप्टरमार्फत कीर्तिपुर बर्न अस्पतालमा लगिएको थियो । बर्न अस्पतालमा अनिताको उपचार भइरहेको छ । घाइतेहरू गोमादेवी र सन्तोष उपचारपछि घर फर्किएका प्रहरीले जनाएको छ ।