काठमाडौं – गृहमन्त्री रमेश लेखकले मधेशका प्रमुख जिल्ला अधिकारीहरुलाई पानीको समस्या समाधान गर्न निर्देशन दिएका छन् ।

मधेशलाई सङ्‍कटग्रस्त क्षेत्र घोषणा गरिएको सन्दर्भमा गृह मन्त्रालयमा आयोजित समन्वयात्मक बैठकमा बोल्दै गृहमन्त्री लेखकले वैकल्पिक स्रोतहरुको पहिचान र वैज्ञानिक वितरणको व्यवस्था मिलाउनका लागि प्रमुख जिल्ला अधिकारीलाई सहजीकरण र समन्वय गर्न निर्देशन दिए ।

‘हिजोमात्रै प्रधानमन्त्रीले बोरिङ गर्ने भनेर घोषणा गर्नुभएको छ कुनकुन ठाउँमा बोरिङ गर्नुपर्ने हो पहिचान गर्नुपर्‍यो
आवश्यक्तालाई प्राथमिकीकरण गर्नुपर्‍यो । छिटो प्रक्रियाबाट बोरिङ ट्युबवेल जडान गर्ने काम थाल्नुपर्‍यो ।’

मधेशमा खानेपानी र सिंचाइको समस्या भएका स्थानहरुको पहिचान गर्नुपर्ने, चापाकल, बोरिङ, सेलोट्युवेल, ड्रिप ट्युबवेल सुकेको कुरा पनि आइरहेको बताउँदै गृहमन्त्री लेखकले विपद्‍ सङ्‍कट ग्रस्त क्षेत्र घोषणा गरेको सन्दर्भमा स्थानीय प्रशासन, प्रमुख जिल्ला अधिकारीहरुलाई विशेष अधिकार रहेको बताए । उनले ती अधिकारहरुको प्रयोग गरेर चाँडो समस्याको समाधान गर्ने बताए ।