काठमाडौं– नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले संघीय निजामती सेवा विधेयकमा नेकपा एमालेको दोहोरो चरित्र देखिएको टिप्पणी गरेका छन् । 

शनिबार काठमाडौंको सीतापाइलास्थित सहिद शिक्षक स्मृति केन्द्रमा बहुउद्देश्यीय भवनको उद्घाटन गर्दै उनले विधेयकमाथि राष्ट्रियसभामा संशोधन हालेर एमालेले दोहोरो चरित्र देखाएको टिप्पणी गरेका हुन् । 

‘कुलिङ पिरियडमा एमालेले अन्ततः म्याउ गर्‍यो,’ अध्यक्ष प्रचण्डले भने, ‘एमालेका सांसदहरूले राष्ट्रियसभामा ल्याएको संशोधन प्रस्तावबाट माओवादी केन्द्रले उठाएको शंका पुष्टि भएको छ ।’ 

प्रचण्डले पछिल्लो पटक आफ्नो नेतृत्वको सरकारले शिक्षकहरूसँग गरेको सहमति कार्यान्वयनका लागि वर्तमान सरकारले तत्परता नदेखाएको भन्दै असन्तोष व्यक्त गरे । 

‘सरकार तयार नभएपछि तपाईँहरू (शिक्षकहरू) सडकमा रहनुपर्‍यो,’ उनले भने, ‘आन्दोलनमा उत्रिनु भयो । तर, सरकारको नेतृत्वबाट अपमानजनक व्यवहार भयो ।’

उनले शिक्षक आन्दोलन, शिक्षा विधेयक र हालको राजनीतिक परिदृश्यमा माओवादी केन्द्रको भूमिका स्पष्ट पार्दै सरकारले संविधानमा भएको व्यवस्था कार्यान्वयन नगरेको आरोप लगाए । 

‘शिक्षकहरूले सडकमा आउनु नपर्ने अवस्था संविधानले नै सुनिश्चित ग यो,’ प्रचण्डले भने, ‘तर त्यसअनुसार कार्यान्वयन नगर्दा आन्दोलन गर्न बाध्य भए । माओवादी केन्द्र सरकारमा भएको भए शिक्षकहरू अपमानित हुन पर्दैनथ्यो ।’