काठमाडौं- नेकपा एमालेका महासचिव शंकर पोखरेलले पार्टीका मूल नेता तथा प्रधानमन्त्री केपी शर्मा ओलीप्रति हमला बढेको बताएका छन् ।

ओलीविरुद्ध आक्रमण बढेकाले प्रतिरोध गर्न एमालेका नेता कार्यकर्तालाई उनले बिहीबार निर्देशन दिएका छन् । एमाले काठमाडौं जिल्ला कमिटीको छैटौं बैठकलाई बिहीबार टोखामा सम्बोधन गर्दै महासचिव पोखरेलले आज ओलीलाई हमला गर्नेले भोलि कसैलाई बाँकी नराख्ने बताए ।

‘आज एउटा नेतालाई हमला गर्नेले भोलि अरुलाई पनि बाँकी नराख्ने भएकोले त्यस्ता शक्तिहरूलाई निस्तेज पार्नुपर्छ’, उनले भने, ‘प्रधानमन्त्री र पार्टी अध्यक्षका रुपमा केपी शर्मा ओलीलाई जुन आक्रमणको निशाना बनाइएको छ । यो कुरालाई निस्तेज नगरे भोलि अन्य नेतृत्वप्रति पनि यो निशाना सोझिन्छ । ’

उनले सामाजिक सञ्जालमा राजनीतिक भनाइहरू राख्दा माओवादी, समाजवादी, बालेन साह र राष्ट्रिय स्वतन्त्र पार्टीसहितका शक्तिहरूले आक्रमण गर्ने गरेको बताए ।

यस्तो आक्रमणबाट कति हतोत्साहित नहुन उनले कार्यकर्ताहरूलाई सम्झाएका छन् । ‘राजनीतिक कुरा सामाजिक सञ्जालमा राख्दा गाली खाइन्छ, मुख छाड्छन् भनेर भनेर एमालेका केही नेता कार्यकर्ताले पास्नी, बिहे, पार्टी,पारिवारिक तस्बर मात्र हालेको देख्छु’ महासचिव पोखरेलले भने, ‘एमालेहरूले त्यसो गर्न सुहाउँदैन । आफ्ना राजनीतिक कुरा राख्ने र सामूहिक प्रतिवाद गर्ने काम हामीले गर्नुपर्छ । ’