काठमाडौं– चालु आर्थिक वर्षको कुल गार्हस्थ्य उत्पादनमा प्रदेशगत हिसाबले सबैभन्दा धेरै योगदान बागमती प्रदेशको हुने राष्ट्रिय तथ्यांक कार्यालयले जनाएको छ । 

कार्यालयले आज सार्वजनिक गरेको आर्थिक वर्ष ०८१-८२ को प्रादेशिक कुल गार्हस्थ्य उत्पादन अनुमानसम्बन्धी प्रेस नोट अनुसार चालु आर्थिक वर्षमा नेपालको कुल गार्हस्थ्य उत्पादनमा बागमती प्रदेशको ३६.५२ प्रतिशत योगदान रहने भएको हो । कार्यालयले चालु आर्थिक वर्षमा कुल गार्हस्थ्य उत्पादन उपभोक्ता मूल्यमा ६१ खर्ब सात अर्ब हुने प्रारम्भिक अनुमान गरेको छ ।

कुल गार्हस्थ्य उत्पादनमा कोशीले १५.९०, लुम्बिनीले १४.२३, मधेशले १३.१६, गण्डकीले ८.९८, सुदूरपश्चिमले ७.०३ र कर्णाली प्रदेशले ४.१९ प्रतिशत योगदान गर्ने कार्यालयको प्रारम्भिक अनुमान छ । साथै, चालु आर्थिक वर्षमा गण्डकीको प्रदेशको आर्थिक वृद्धिदर सबैभन्दा धेरै हुने अनुमान गरेको छ ।

कार्यालयको प्रेस नोटअनुसार चालु आर्थिक वर्षमा गण्डकी प्रदेशको सबैभन्दा धेरै ५.५१ र दोस्रोमा बागमतीको ५.१८, कर्णालीको ४.७४, लुम्बिनीको ४.७०, मधेशको ४.५० र कोशी प्रदेशको ३.३४ प्रतिशत आर्थिक वृद्धि हुने प्रारम्भिक अनुमान छ ।

त्यस्तै, सो अवधिमा सुदूरपश्चिमको सबैभन्दा थोरै ३.३२ प्रतिशत मात्रै योगदान हुने प्रेस नोटमा उल्लेख छ ।